Qapshaǵaı polıtseıleri aıazdy kúni dalada jatqan adamdy qutqaryp qaldy
TALDYQORǴAN.QazAqparat - Qapshaǵaı qalasynyń tártip saqshylary aıazdy kúni dalada qozǵalyssyz jatqan adamnyń ómirin qutqaryp qaldy, dep habarlaıdy QazAqparat tilshisi.
Qapshaǵaı qalasy polıtsııa bóliminiń qyzmetkerleri túngi mezgilde ákimshilik aýmaqty avtopatrýldeý kezinde saıajaılarǵa baratyn jolda qozǵalyssyz jatqan adamdy baıqaǵan.
Jedel qasyna kelgenda onyń mas ekeni jáne denesinde úsik shalý belgileri baıqalǵan.
«Saıajaılarǵa baratyn joldaǵy kópirdiń astynda jatqan adamnyń sulbasyn baıqap qaldyq. Dala qatty aıaz edi. Jatqan adamnyń qolynan úsik shalý belgilerin kórip, birden sol jerge jedel járdem shaqyrdyq. Dárigerler turǵyndy aýrýhanaǵa alyp ketti»,- deıdi №258 ekıpajdyń múshesi, polıtsııa kishi leıtenanty Ádilbek Júnishanov.
43 jastaǵy turǵyn Qapshaǵaı qalasynyń jergilikti aýrýhanaǵa jetkizilgen.
Oǵan alkogoldik masańdyq jáne deneniń qatty muzdaýy dıagnozy qoıylǵan.
Birneshe saǵattan keıin turǵyn emdelý úshin úıine jiberilgen.
Óz kezeginde polıtseıler qysqy mezgilde balalar men masań kúıdegi adamdardy dalaǵa baqylaýsyz jiberýdiń qaýipti ekenin eskertedi.
Áleýmettik jeli arqyly qala turǵyndaryna úndeý tastaǵan polıtseıler osyǵan uqsas qandaı da bir jaǵdaıǵa kýá bolsa, jedel túrde 102 námirine nemese ózge de arnaıy qyzmetterge habar berýin suraıdy.
