«Qapshaǵaı óńiriniń gaz jelileri» básekelestik zańnamasyn buzǵany anyqtaldy
ASTANA. KAZINFORM — Básekelestikti qorǵaý jáne damytý agenttiginiń Almaty oblysy boıynsha departamenti júrgizilgen taldaý jáne Almaty oblysynyń prokýratýrasy usynǵan aqparat negizinde «Qapshaǵaı óńiriniń gaz jelileri» JShS-niń áreketterinen básekelestikti qorǵaý týraly zańnamany buzý belgilerin anyqtady.
— JShS kommýnaldyq-turmystyq jáne ónerkásiptik tutynýshylarmen taýarlyq gazdy bólshek saýdada ótkizý sharttaryn jasasý kezinde aı sońynda gazdy tolyq almaý nemese tutynýdan bas tartý jaǵdaıynda tutynýshydan paıdalanylmaǵan gaz kóleminiń qunynan 10% mólsherinde «jiberilgen paıdany óteý» talaptaryn qosqan. Mundaı talaptar «Gaz jáne gazben jabdyqtaý týraly» zańynda jáne Gaz satý erejelerinde kózdelmegen.
Sondaı-aq taldaý barysynda, seriktestik jyl saıynǵy mindetti turmystyq gaz jabdyqtaryna tehnıkalyq qyzmet kórsetýdi tolyq kólemde júrgizbegeni, alaıda kórsetilmegen qyzmetter úshin de shot-faktýralar usynǵany anyqtaldy, — delingen Básekelestikti qorǵaý jáne damytý agenttigi habarlamasynda.
Kórsetilmegen qyzmet úshin tólem alý adal kásipkerlik qaǵıdattaryn buzyp, jetkizýshiniń sharttyq mindettemelerin oryndaýǵa degen qyzyǵýshylyǵyn tómendetedi.
Atalǵan áreketter Kásipkerlik kodeksiniń 174-baby 4) tarmaqshasyna sáıkes, domınanttyq jaǵdaıdy teris paıdalaný retinde saralanady.
Taldaý qorytyndysy boıynsha seriktestikke:
- Gazdy tolyq almaý jaǵdaıynda «jiberilgen paıdany óteý» týraly sharttardy kelisimderden alyp tastaý;
- TQJ boıynsha kórsetilmegen mindetti qyzmetter úshin shot-faktýralardy usynýdy toqtatý jóninde habarlama jiberildi.
Departamenttiń habarlamasyn Seriktestik tolyq oryndady.
Aıta ketelik Básekelestikti qorǵaý agenttigi Antitrust aqparattyq portalyn ázirlep jatyr.