«Qapshaǵaı» qoımasyndaǵy sý kólemi byltyrǵydan az – mınıstrlik

NUR-SULTAN. QazAqparat – «Qazgıdromettiń» málimeti boıynsha, bıyl Qapshaǵaı sý qoımasyna 16 360 mln m3 sý jınalǵan. Bul byltyrǵydan 1 130 mln m3 kem. Bul týralyEkologııa, geologııa jáne tabıǵı resýrstar mınıstriniń orynbasary Serik Qojanııazov QazAqparat tilshisiniń saýalyna bergen jaýabynda aıtty.

«Qapshaǵaı sý qoımasynyń kólemi 16 360 mln m3 quraıdy. Bul ótken jylmen salystyrǵanda 1 130 mln. m3 kem. Bartoǵaı sý qoımasynyń kólemi 260 mln.m3. Ótken jylmen salystyrǵanda 25 mln. m3 az», - dedi vıtse-mınıstr.

Kútiletin sýdyń azdyǵyna baılanysty vedomstvo aýyl sharýashylyǵy taýaryn óndirýshilerdi sýarmaly sýmen qamtamasyz etý úshin sý qoımalaryn barynsha toltyrý qamyna kirisip ketti.

«Qazir aýyl sharýashylyǵy mınıstrligimen, jergilikti atqarýshy organdarmen birge sý tutyný lımıtin eskere otyryp, egis qurylymyn ońtaılandyrý; aýyl sharýashylyǵy kooperatıvteriniń qatysýymen sýarý arnalarynyń daıyndyǵyn qamtamasyz etý; sý berýdiń onkúndik saıynǵy jedel kestelerin jasap jáne saqtaı otyryp, táýliktik sý paıdalaný josparyna kóshý; sý aınalymyn engizý jáne sýarý kezegin qatań saqtaý málelerein pysyqtap jatyrmyz», - dep jazylǵan vıtse-mınıstrdik jaýabynda.

Buǵan deıin habarlaǵanymyzdaı, jalpy elimizdiń 3 óńiri boıynsha aldaǵy 10 jylda 29 myń gektar kúrish alqabyn qysqartý josparlanǵan.

Salaǵa jaýapty mınıstrlik deregi boıynsha, qysqarǵan kúrish alqaptarynyń ornyna baqsha daqyldary men mal azyǵyna qajet kópjyldyq shópter egilýi múmkin.