Qapshaǵaı kóliniń jaǵalaýy damı túspek
TALDYQORǴAN. QazAqparat - Qapshaǵaıdyń eń basty baǵyttarynyń biri - kóldiń jaǵalaýyn damytý. Qala ákimi Talǵat Qaınarbekov osy maqsatta atqarylyp jatqan jumystardyń barysymen oblys basshysyn tanystyrdy, dep habarlaıdy QazAqparat Almaty oblysy ákiminiń baspasóz qyzmetine silteme jasap.
Qala ákiminiń aıtýynsha, jalpy aýmaǵy 8,2 ga 5-shi jáne 6-shy jaǵajaılarǵa bıylǵy jylǵa 265 mln. teńge bólingen. Munda jaǵalaý voleıboly, fýtbol jáne balalardyń oıyn alańdary, qaıyqqa arnalǵan pırs, basqa da qajetti múmkindikterdiń bári jasalmaq. Oblys ákimi Amandyq Batalov demalys aımaǵynyń eń aldymen sapaly jasalýyna, qyzmet kórsetý quny qarapaıym turǵyndar úshin qoljetimdi bolýyna nazar aýdarýdy mindettedi. Týrızmdi damytýǵa zor yqpal etetin jaǵalaýdy abattandyrý jobasyn ázirlep, usynýdy tapsyrdy. Oblys basshylyǵy tarapynan bul iske barlyq qajetti kómek pen qoldaý kórsetiletinin aıtty.
Sondaı aq Amandyq Batalov Qapshaǵaı qalasyndaǵy jumys sapary barysynda qalanyń 1-shaǵynaýdanyndaǵy № 17, 19 úılerdiń aýlalarynda bolyp, aýla alańdaryn jańartý jobalarymen tanysty. Aýdandyq TÚKSh bóliminiń basshysy Qaırat Kúlenbaevtyń aıtýynsha, jalpy aýlalardy abattandyrý kezeń-kezeńimen iske asyrylyp, oǵan jalpy somasy 687 mln. teńge bólinbek. Al bıylǵy jyly bul jumystyń alǵashqy kezeńine 100 mln. teńge oblystyq bıýdjetten qarastyrylǵan. Osy qarjyǵa qaladaǵy 12 aýlany kórkeıtý josparlanǵan. Balalardyń oıyn alańdary, basketbol, fýtbol alańdary, oryndyqtar, ýrnalar, qorshaýlar, jaıaý júrginshi joly - barlyq jaǵdaılar jasalatyn bolady. Oblys ákimi Amandyq Batalov aýlany abattandyrý barysynda aýladaǵy balalardyń erkin oınap, qarııalardyń demalyp, áńgimelesip otyrýlaryna qolaıly jaǵdaılardyń bári sapaly qarastyrylýy kerektigin basa tapsyrdy.
