Qapshaǵaı kólinde daýyl kezinde jaǵaǵa jete almaǵan balyqshylar qutqaryldy
TALDYQORǴAN. QazAqparat - Qapshaǵaı kólinde daýyl kezinde jaǵaǵa jete almaǵan balyqshylar qutqaryldy, dep habarlaıdy QazAqparat tilshisi.
«22 qańtar kúni Almaty oblystyq TJD Qapshaǵaı óńiriniń Jedel-qutqarý jasaǵynyń qutqarýshylary patrýldeý kezinde jaǵalaýdan úsh shaqyrym jerde qalǵan balyqshylardy qutqardy. 4 adam muz oıyǵynan balyq aýlap júrgen. 65, 45, 44 jáne 36 jastaǵy er adamdar (Qapshaǵaı jáne Almaty qalalarynyn turǵyndary) qatty jelde jaǵaǵa jete almaǵan»,- delingen Almaty oblystyq TJD baspasóz qyzmetiniń habarlamasynda.
Vedomstvonyń aqparatyna sáıkes, qutqarýshylar «Slavır-9Ý» aýa jastyqshasy bar arnaıy keme kómegimen azamattardy jaǵaǵa evakýatsııalady.
Esterińizge sala keteıik, 20 qańtarda Almaty oblysy TJD SMS habarlama, «Dármen» mobıldi qosymsha jáne buqaralyq aqparat quraldary arqyly 22-23 qańtarda Almaty oblysynyń keı jerlerinde qatty jaýyn-shashyn (jańbyr, qar), boran, tuman, kóktaıǵaq bolatynyn eskertti. 22 qańtarda kúndiz jáne 23 qańtarda túnde jel soltústik batystan ońtústik batysqa aýysyp, 15-20 m/s, keı jerlerde ekpini 23-28 m/s jetedi, tipti 30 m/s asyp ketetindikten daýyldy eskertýi jarııalandy.
Almaty oblysynyń TJD azamattardy aýa raıynyń ózgerýin baqylap, daýyl kezinde alys jolǵa jáne muz ústine shyqpaýǵa shaqyrady.
