Qapshaǵaı kazınosynan jalaqylaryn almaǵan jumysshylar ashtyq jarııalady
TALDYQORǴAN. QazAqparat - Qapshaǵaıdaǵy kazınnodan úsh aıdan beri jalaqylaryn almaǵan jumysshylar ashtyq jarııalady. Qazir osy jaǵdaıǵa baılanysty arnaıy shtab qurylyp, oqıǵa ornynda jumys istep jatyr, dep habarlaıdy QazAqparat tilshisi.
«Bul másele - oıynhana men jumysshylar arasynda bolyp jatqan daý. Anyqtaǵanymyz, 270 adam eńbekaqylaryn ala almaı júr. Olardyń aldyndaǵy qaryz kólemi - 130 mln teńge kóleminde. Qaryz úsh aı kóleminde tólenbegen. Búgingi kúni daǵdarysqa baılanysty shtab kezdesýi boldy. Barlyq músheleri qatysty. Sonda oıynhananyń dırektorlary da kelip, osynda ýádelerin berip ketti. Búgingi kúnge 45 mln teńgeni tóleımiz dedi. Jańaǵy ashtyq jarııalap otyrǵan 18 adamnyń ókili de boldy. Olar da ashtyq toqtatýǵa sóz berdi. Toqtatpaǵan jaǵdaıda, zań bar, soǵan sáıkes barlyq quzyrly organdar búginnen bastap jumysqa kirisip ketti. Prokýratýra, eńbek ınspektsııasy, salyqtyń ókilderi osy mán-jaıdy anyqtaımyz. Ázirge jumysshylar sotqa aryz túsirmedi», - dedi Almaty oblystyq eńbek ınspektsııasy basqarmasynyń bastyǵy Kerimbek Janshabaı.
Al Qapshaǵaı qalasy ákimdiginiń málimetinshe, oıynhanadaǵy jalaqy daýy «Alty Alma» kazınosynda bolyp jatyr. Aıtýlarynsha, atalǵan oıynhana jumysyn toqtatqanyna bir aıdaı ýaqyt bolǵan.
Esterińizge sala keteıik, buǵan deıin Qapshaǵaıdaǵy kazıno jumysshylarynyń eńbekaqylaryn ala almaı júrgenin habarlaǵan bolatynbyz.
