«Qapshaǵaı qaýip teńizine aınalyp barady» - respýblıkalyq basylymdarǵa sholý

***

«Alash aınasy» gazetiniń búgingi sanynda Ulttyq ǵylymı-medıtsınalyq ortalyqtyń dırektory Abaı Baıgenjınmen aradaǵy suhbat jarııalanǵan. Júrek mamany «búginde biz jasaıtyn operatsııalardyń sapasy Reseıden 11 esege artyq. Olarda júrek operatsııasy kezinde bolatyn ólim - 11 paıyz. Al bizde - bir-aq paıyz», - deı kelip, «qazir arnaıy baǵdarlama aıasynda respýblıkamyzdyń 14 oblysynda júrekke operatsııa jasaıtyn bólimder ashtyq. Bul arqyly júrek aýrýlary problemasyn alqymdadyq dep aıta alamyz. Biraq aldymyzda áli de úlken problemalar bar. Ol - balalardyń kardıohırýrgııasyn ashý. Sol jaǵalaýda jasalyp jatqan klınıkanyń negizin balalar kardıohırýrgııasyna aınaldyrý kerek dep esepteımin. Qazirgi tańda balalar kardıohırýrgııasy aýadaı qajet. Óıtkeni elimizdegi balalardyń júrek aýrýy ózekti máselege aınaldy», deıdi. Suhbattyń tolyq nusqasyn basylymnyń búgingi sanynan «Bizge balalar kardıohırýrgııasy aýadaı qajet» degen taqyryptan oqı alasyzdar.

Sondaı-aq osy basylymnyń ekinshi betinde «Qapshaǵaı qaýip teńizine aınalyp barady» degen maqala basyldy. Onda ótken jyldarmen salystyrǵanda, bıylǵy sýǵa túsý maýsymy Almaty oblysynda qaıǵyly oqıǵalarǵa toly bolǵany aıtylǵan. Málimetterge súıensek, Jetisý óńirinde bar bolǵany úsh aıdyń ishinde júzge jýyq adam sýǵa ketken. Qaraly tizimge ilikkenderdiń kópshiligi ajalyn Qapshaǵaı demalys ornyndaǵy sýqoımasynan taýypty. Sondaı-aq Almaty oblystyq tótenshe jaǵdaılar jónindegi departament mamandary taratqan málimetke súıensek, ótken sýǵa túsý maýsymynda oblys kólemindegi ózen-sýlarda barlyǵy 158 tótenshe oqıǵa tirkelgen. Qutqarýshylardyń kómegine 192 adam júginse, onyń 91-in darııa jutyp qoıǵan. Bul ótken jyldyń osy merzimimen salystyrǵanda 21 adamǵa kóp. Almaty oblystyq tótenshe jaǵdaılar jónindegi departament baspasóz qyzmetiniń bas mamany Nurlan Serperbaevtyń aıtýynsha, qaıǵyly oqıǵalardyń kóptigi jaǵynan Qapshaǵaı birinshi orynda tur. Munda 29 adam batyp ketken. Sol sııaqty Eńbekshiqazaq aýdanynda - 11 jáne Іle aýdanyndaǵy ózen-sýlarda 10 adam sýǵa ketken.

***

«Qazaqstan Prezıdenti Nursultan Nazarbaevtyń Ýkraınaǵa jasaǵan ekikúndik resmı sapary aıaqtaldy. Kıevtegi basqosý eki jaqqa da óte tıimdi hám paıdaly bolǵanyn basa aıtqan jón. Taraptar úshin mańyzdy degen basty-basty birneshe qujattarǵa qol qoıyldy», dep jazady «Aıqyn» gazeti búgingi nómirinde basylǵan «Ýkraına - Qazaqstannyń TMD keńistigindegi negizgi saıası jáne ekonomıkalyq seriktesteriniń biri» degen taqyryptaǵy maqalasynda. Basylymnyń atap ótýinshe, kelissózder barysynda kún tártibindegi negizgi halyqaralyq máseleler jóninde pikir almasylǵan. Atap aıtqanda, EQYU, TMD jáne ózge de uıymdar aıasynda Qazaqstan men Ýkraınanyń yntymaqtastyǵy jóninde sóz boldy. Elbasynyń resmı sapary jaıynda egjeı-tegjeıli oqyp bilgińiz kelse, basylymnyń búgingi sanyn jiberip almańyz.

«2010 jyly EQYU-ǵa tóraǵa bolyp otyrǵan Qazaqstan 2011 jyly Islam konferentsııasy uıymyn basqarmaq. Qazaqstannyń Islam konfe­rentsııasy uıymynyń janyndaǵy turaqty ókili Baqyt Batyrshaev Jıddada atalmysh uıymnyń Bas hatshysynyń orynbasary Hamıd Opeloıerýmen kezdesti. Kezdesý kezinde H.Opeloıerý myrza Islam konferentsııasy uıymy qoǵam­dastyǵy Qazaqstannyń qarqyndy damýyn, onyń ekonomıkalyq áleýeti men halyqaralyq bedeliniń birtindep nyǵaıý úderisin qana­ǵat­tanarlyqpen qadaǵalap otyrǵanyn habarlady», dep jazady «Aıqyn» gazeti «IKU-ǵa tóraǵalyq tusynda qandaı baǵyttarǵa basymdyq berýimiz kerek?» degen taqyryptaǵy maqalasynda. Tóraǵalyq tusyndaǵy basym baǵyttar jaıynda bilgińiz kelse, basylymnyń búgingi sanyn jiberip almańyz.

Álemde qyzyqty derekter óte kóp. Olardy túgel tizip shyǵý úshin tom-tom kitap jazý kerek shyǵar. Degenmen osyndaı qyzyqty málimetterdi jıyp-terip júretinder de bar. Sol sııaqty, bireýge qyzyq kóringen derektiń bireýge túkke turǵysyz kórinýi múmkin. Endeshe, sondaı kóp derektiń bir parasyn oqyp, bilgińiz kelse, «Aıqyn» gazetindegi «Qyryq quraý qyzyqtar...» degen derekterge nazarlaryńyzdy salyńyzdar. Máselen, basylymnyń jazýynsha, adam kúnine orta eseppen 13 ret kú­letin kórinedi. Átesh aldymen moınyn sozbaı sha­qy­ra almaıdy eken. Eger tilińizdiń túsi kúlgin bolsa, ol «taza» degen sóz, aǵaryp tursa, bak­terııa qabaty túzilgendiginiń belgisi. Áıelderge qulaqqaǵys - pııaz tý­raý barysynda kóz ashymas úshin saǵyz shaı­naǵan jón eken. Bal asqazanda nege tez qory­tyla­dy? Óıtkeni ony aralar qorytyp úl­gergen.

***

«Astana aqshamy» gazetiniń jazýynsha, qalaǵa jylý berý maýsymy aǵymdaǵy jyly qazannyń 15-inde bastalmaq. Osy jaýapty kezeńge tıisti mekemelerdiń ázirligi jaman emes. Degenmen daıyndyq jumystaryn taǵy bir pysyqtap, týyndaǵan máselelerdi talqylaý úshin Astana ákimi Imanǵalı Tasmaǵambetov arnaıy alqaly jıyn ótkizgen. Bul jaıynda basylymnyń beısenbilik nómirindegi «Qala qysqa qapysyz qamdandy» degen taqyryptaǵy maqaladan egjeı-tegjeıli bile alasyzdar.

***

«Keshe Nursultan Nazarbaev túrki tildes memleketter basshylarynyń 10-shy sammıtine qatysý úshin Ystambulǵa keldi», dep jazady «Kazahstanskaıa pravda» gazeti. Basylymnyń atap ótýinshe, osy kúni Memleket basshysy Túrkııanyń prezıdenti Abdolla Gúlmen kezdesken. Al búgin «Chıragan» saraıynda ótetin sammıtke Qazaqstan Prezıdenti Nursultan Nazarbaev, Ázirbaıjan Respýblıkasynyń Prezıdenti Ilham Álıev, Túrik Respýblıkasynyń Prezıdenti Abdolla Gúl, Qyrǵyz Respýblıkasynyń Prezıdenti Roza Otynbaeva, Túrikmenstan Prezıdenti Qurbanquly Berdimuhammedov qatysady.