Qapshaǵaı qalasynyń əkimi BAQ ókilderin quttyqtady
TALDYQORǴAN.QazAqparat - Almaty oblysyndaǵy Qapshaǵaı qalasynyń əkimi Talǵat Qaınarbekov jýrnalıster kúni qarsańynda BAQ ókilderin kəsibı merekesimen quttyqtady. Respýblıkalyq jəne oblystyq telearna, gazet tilshilerin alǵys hattarmen marapattap, qurmet kórsetti, - dep habarlaıdy QazAqparat tilshisi.
Shara barysynda mereke ıeleri Qapshaǵaı qalasynyń aýmaǵynda júzege asyp jatqan birqatar jobalarmen tanysty. Sonyń ishinde balamaly qýat kózderin óndirýge arnalǵan biregeı keshen de bar. Kún elektrstantsııasynyń qýattylyǵy 2 MVt. Bolashaqta kún nuryna baı ólkede qýattylyqty 200mvt-qa deıin jetkizý josparlanýda. Bul kezeń-kezeńmen júzege asatyn bolady. Sondaı-aq shahar basshylyǵy jýrnalısterdi Qapshaǵaı kólimen kememen qydyrtty. Búginde bul aımaqta týrızm salasy qarqyndy damýda. 150-ge jýyq demalys oryndary jumys istep tur. Byltyr 325 myńnan astam týrıst kóldiń jaǵasynda demalǵan. Olarǵa 345 mln teńgeniń qyzmeti kórsetilgen.
"Bıyl demalýshylardyń sany eki esege artady degen úmittemiz. Qazir Almaty-Taldyqorǵan tas joly jasaldy. Shomylý maýsymy bastalǵannan beri kelýshilerdiń qarasy qalyń", - deıdi qalalyq týrızm jəne sport bóliminiń basshysy Natalıa Nosova.
Qazir Qapshaǵaıda qarapaıym halyqqa arnalǵan qalalyq jaǵajaı jasalyp jatyr.
"Jaǵajaı zaman talabyna saı bolady. Ol jerde jaryqtandyrylǵan jol, jýynatyn, kıinetin jerler sııaqty kóptegen dúnıeler qarastyrylǵan. Qazir eki jaǵajaıdyń qurylysy júrip jatyr", - dedi N. Nosova. Al jobaǵa səıkes bolashaqta olardyń sany beseýge deıin jetedi.
