Qapshaǵaı qalasynyń ákimi esep berdi
TALDYQORǴAN. QazAqparat - Búgin Qapshaǵaı qalasynyń ákimi Talǵat Qaınarbekov turǵyndar aldynda qorytyndy esepti jıynyn ótkizdi.
Sharaǵa Almaty oblysynyń ákimi Amandyq Batalov qatysty, dep habarlaıdy QazAqparat óńir basshysynyń baspasóz qyzmetine silteme jasap.
Qala ákimi T. Qaınarbekov 60 myńnan astam turǵyny bar Qapshaǵaıda ótken jyly atqarylǵan jumystar týraly esep berip, aldaǵy josparlary týraly baıandady. Onyń habarlaýynsha, ótken jyly óndirilgen ónerkásip óniminiń kólemi 50 mlrd. teńgege jýyqtap, 2015 jylmen salystyrǵanda 132,3 % quraǵan. Negizgi kapıtalǵa tartylǵan ınvestıtsııa kólemi 22,8 mlrd. teńgege jetip, onyń ishinde bıýdjetten tys ınvestıtsııa 51,2% boldy. Júzege asyrylǵan jobalardyń ishinde «ANNAR» jel elektr stansasy, «Grın Lend Alataý» JShS men «LSTmarket» jylyjaılaryn keńeıtýdiń 2-shi kezeńderin atap ótýge bolady. Atalmysh jobalardy júzege asyrý barysynda 145 jańa jumys orny qurylǵan.
Qazirgi kezde ónerkásip óndirisi áleýetin arttyrý maqsatynda qalany birneshe sektorǵa bólip qarastyryp, damytý josparlanyp otyr. Olar: Qapshaǵaı óńiri, Zarechnyı aýyldyq okrýgi jáne «Arna» ındýstrıaldy aımaǵy.
