Qapshaǵaı qalasynyń 100 gektar alma baǵy alǵashqy ónimin beredi
TALDYQORǴAN. QazAqparat - Qapshaǵaı qalasyna qarasty Sheńgeldi aýylynyń mańyndaǵy alma baq bıyl alǵashqy ónimin beredi. 2011 jyly salynǵan ıntensıvti baqtyń aýmaǵy 100 ga, -dep habarlaıdy QazAqparat tilshisi.
Tamshylatyp sýarý ádisin qoldanatyn sharýashylyq shamamen ár gektarynan 5-7 tonnaǵa deıin alma jınaýdy josparlap otyr. Bul jerde almanyń «golden delıshes», «starkrımson», «zarıa alataý» sorttary ósirilýde. Kásiporyn alǵashqy ónimin Almaty qalasynyń saýda oryndaryna ótkizbek. Bul jobaǵa 2 mlrd teńge ınvestıtsııa tartyldy.
Sondaı-aq osy «NurAgro» agrofırmasy 103 gektar aýmaqqa pııaz ósirip jatyr. Pııaz alqaby da tamshylatyp sýarylady. Sharýashylyq basshysy Qasymjan Januzaqovtyń aıtýynsha, tamshylatyp sýarý ádisimen mol ónimge qol jetkizip otyr. Pııaz negizinen Reseı jáne Ýkraınaǵa eksporttalady.
