Qapshaǵaı qalasynda Kásipkerlerge qyzmet kórsetý ortalyǵy ashyldy
QAPShAǴAI.QazAqparat - Búgin Qapshaǵaı qalasynda Kásipkerlerge qyzmet kórsetý ortalyǵy ashyldy. Jańa nysanda «bir tereze» qaǵıdaty boıynsha býhgalterlik, zańgerlik, marketıngtik qyzmetter, memlekettik satyp alý, kásipkerlikti qoldaýǵa arnalǵan memlekettik baǵdarlamalar boıynsha keńester beriledi, dep habarlaıdy QazAqparat tilshisi.
Almaty oblystyq Kásipkerler palatasynyń dırektory Narıman Ábilshaıyqovtyń sózinshe, Qapshaǵaı qalasyndaǵy KQKO Almaty oblysynda aýdandyq jáne qalalyq deńgeıde ashylǵan tuńǵysh ortalyq eken.
«Bul Ortalyqtyń ashylýy Qapshaǵaı kásipkerlerine tolyq qyzmet kórsetip qana qoımaı, Balqash jáne Kerbulaq aýdanynyń kásipkerlerine de tıisti qyzmet kórsetýge múmkindik beredi. Kásipkerlerge qyzmet kórsetý ortalyqtaryn Talǵar men Qarasaı aýdandarynda da ashýdy josparlap otyrmyz. Osylaısha, bizdiń qyzmet Almaty óńirindegi kásipkerler úshin odan ary qoljetimdi jáne qolaıly bolady», - dedi oblystyq Kásipkerler palatasynyń dırektory Narıman Ábilshaıyqov.
Jańadan ashylǵan Kásipkerlerge qyzmet kórsetý ortalyǵynda memlekettik organ ókilderi kásipkerlerdi sáýlet jáne qala qurylysy, jer qatynastary máseleleri boıynsha qabyldap, qyzmet kórsetedi. Sonymen birge Kásipkerlerge qyzmet kórsetý ortalyǵy ǵımaratynda «Bıznes mektep» komponenti boıynsha kásipkerlik negizderine oqytý men semınarlar júrgiziledi.
Aıta keteıik, bıyl Kásipkerler palatasynyń Qapshaǵaı qalalyq fılıaly kásipkerlerge 500-deı servıstik qyzmet kórsetip, keńes berdi. Ótken jyly 45 bıznes-jospar ázirlenip, onyń 16-y jalpy quny 72 mln teńgege «Nátıjeli jumyspen qamtý jáne jappaı kásipkerlikti damytý» baǵdarlamasy aıasynda qarjylandyryldy. Qalalyq fılıaldyń qoldaýymen 2017 jyly «Bıznestiń jol kartasy - 2020» baǵdarlamasy aıasynda 28 mln teńgege 2 joba qarjylandyryldy jáne 3 joba quny 4,5 mln teńge bolatyn memlekettik grantqa ıe boldy. «Bıznes-keńesshi» jobasy boıynsha 36 qapshaǵaılyq bıznes oqytýdan ótti. Al «Іskerlik baılanystar» jobasy arqyly 3 kásipker shetelde óz biliktiligin arttyryp keldi.
Eske sala keteıik, Almaty oblysyndaǵy tuńǵysh tolyqformatty Kásipkerlerge qyzmet kórsetý ortalyǵy jyl basynda Taldyqorǵanda iske qosylǵan bolatyn.
