Qapshaǵaı-Almaty-Qapshaǵaı temir jol jelisi iske qosyldy
ALMATY. QazAqparat- Búgin Almatyda «Solux Express» kompanııasy Qapshaǵaı-Almaty-Qapshaǵaı baǵytyndaǵy temir jol jelisin iske qosty. Bul týraly kompanııa dırektory Joldasbek Qurmanov málim etti.
«Poıyz kún saıyn tańerteń jáne keshki ýaqytta júretin bolady. Óıtkeni, bul almatylyqtar úshin óte yńǵaıly. Demalys kúni tańerteń poıyzben Qapshaǵaıǵa kelip, demalyp, sýǵa shomylyp bolǵan soń, keshke sol poıyzben Almatyǵa oralýǵa bolady. Kún saıyn birinshi reıs Qapshaǵaıdan jasalady. Osy Qapshaǵaı jáne oǵan jaqyn ornalasqan eldimekenderdiń Almatyda jumys isteıtin turǵyndary endi osy poıyzben tańerteń Almatyǵa jumysqa baryp, keshke sol poıyzben úılerine kele alady», - dedi J. Qurmanov.
Óz kezeginde Almaty qalasy Jolaýshylar kóligi basqarmasy basshysynyń mindetin atqarýshy Erlan Ádilov bul áleýmettik jobanyń qala ekologııasyn jaqsartýǵa baǵyttalǵandyǵyn basa atap kórsetti.
Sonymen, poıyzdyń júrý ýaqyty - 1,5 saǵat. Tańǵy poıyz 06:30-da Qapshaǵaı qalasynan Almatyǵa júredi. Almatyǵa kelgen soń, tańǵy saǵat 08:40-ta «Almaty-1» temir vokzalynan Qapshaǵaıǵa qaraı jol tartady. Al, keshki ýaqytta poıyz saǵat 17:55-te Almatyǵa qaraı júredi. «Almaty-1» vokzalyna kelgen soń, keshki saǵat 20:20-da keri qaraı jolǵa shyǵyp, Qapshaǵaıǵa oralady.
Temir jol quramy tolyqqandy jabdyqtalǵan 5 jaıly vagonnan turady. 280 orynǵa shaqtalǵan jáne Wi-FI jelisine qoljetimdi.
«Ázirge poıyz tek jazǵy mezgilde júretin bolady. Biraq, aldaǵy ýaqytta ony jyl on eki aı júrip turatyn poıyzǵa aınaldyrýdy josparlap otyrmyz. Maqsatymyz - turǵyndardyń júrip-turý qaýipsizdigin qamtamasyz etý», - dedi «Solux Expess» kompanııasynyń joba jetekshisi Nurlan Qujbanov.
Aıta ketelik, poıyz bıleti - 600 teńge turady. Jeti jasqa deıingi balalarǵa jol júrý - tegin.
