Kappadokııada jartas opyrylyp, eki adam qaza tapty
ASTANA. KAZINFORM — Túrkııanyń ortalyq bóligindegi Kappadokııa aımaǵynda Gereme ashyq aspan astyndaǵy mýzeıiniń mańynda jartas opyrylyp, eki adam qaza tapty. Taǵy 5 adam jaraqat aldy. Oqıǵaǵa tolassyz jaýǵan jańbyr men topyraqtyń shaıylýy sebep bolýy múmkin, dep habarlaıdy BBC.
Qazir mamandar oqıǵanyń mán-jaıyn anyqtap jatyr. Aldyn ala boljam boıynsha sońǵy kúnderi jaýǵan nóser jańbyr topyraqty shaıyp, jartastyń bir bóliginiń opyrylýyna ákelgen.
Opyrylǵan jartas Kappadokııaǵa tán bıik, konýs pishindi tas túzilimderge jatady. Olardy «ertegidegi murjalar» dep ataıdy. Bul tabıǵı nysandar janartaý jynystarynyń erozııaǵa ushyraýy nátıjesinde qalyptasqan jáne aımaqtyń basty kórikti oryndarynyń biri.
Kappadokııa Túrkııanyń ortalyq bóliginde ornalasqan. Bul óńir erekshe jartasty landshaftymen jáne tarıhı eskertkishterimen týrıster arasynda keńinen tanymal.
Aıta keteıik, Kappadokııada buǵan deıin de «perıbadjı» dep atalatyn biregeı jartas túzilimderi opyrylǵan.
2025 jylǵy qyrkúıekte Gereme eldi mekenindegi osyndaı tabıǵı nysandardyń biri jartylaı qıraǵan edi. Ol kezde zardap shekkender bolǵan joq. Resmı málimet boıynsha buǵan temperatýranyń kúrt ózgerýi, sondaı-aq sýdyń qatýy men erýi sebep bolǵan.
Eske salaıyq, Alma-Arasan shatqalynda jasóspirim jartastan qulap ketti.
