Kappadokııada tý baǵanasynda bılegen týrıstke qatysty qylmystyq is qozǵaldy

ASTANA. KAZINFORM — Túrkııanyń eń iri týrıstik ortalyqtarynyń biri Kappadokııada tý baǵanasynda bı bılegen sheteldik týrıstke qarsy qylmystyq is qozǵaldy, dep habarlaıdy Hurriyet.

Qyz ıÝNESKO-nyń dúnıejúzilik mádenı jáne tabıǵı muralar tizimine engizilgen Kappadokııa óńirindegi mańyzdy oryndardyń biri — Úchhısar qamalynyń tóbesinde turǵan túrik týy ilingen baǵanany paıdalanyp, akrobatıkalyq qımyldar jasady.

Sheteldik týrısttiń mundaı orynsyz áreketi qoǵamda úlken narazylyq týǵyzdy. Nevshehır provıntsııasy gýbernatorynyń ákimdigi málimdeme jasap, tý baǵanasynda bı bılegen adamǵa qatysty tergeý bastalǵanyn habarlady.

Ádilet jáne damý partııasynyń depýtaty Emre Chalyshkan áleýmettik jelidegi jazbasynda bul áreketti qatań aıyptady.

– Tý – bizdiń namysymyz, kózimizdiń qarashyǵy. Muny túsinbegen árbir adamǵa eskertý jasalyp, dereý shara qoldanylýy tıis. Biz Kappadokııada týrısterdi árdaıym qonaqjaılyqpen qabyldap keldik. Alaıda ulttyq jáne rýhanı qundylyqtarymyzǵa mundaı qurmetsizdik múldem qabyldanbaıdy, – dedi ol.

Nevshehırdiń bas prokýratýrasy Túrkııa Qylmystyq kodeksiniń 300 jáne 301-baptary boıynsha sheteldik azamatqa qatysty sotqa deıingi tergeý bastady. Bul baptarda tıisinshe úsh jylǵa jáne eki jylǵa deıingi bas bostandyǵynan aıyrý jazasy qarastyrylǵan.

Qazirgi ýaqytta týrıstiń azamattyǵy men onyń qaıda ekeni belgisiz.