Kappadokııa týry: Qazaqstandyq velosportshylar jeńiske jetti
ASTANA. QazAqparat - Qazaqstandyq velosportshylar Túrkııada ótken Kappadokııa týrynan jeńispen oraldy, dep habarlaıdy QazAqparat Olympic.kz saıtyna silteme jasap.
Atalǵan reıtıngilik týrnırge 5 memleketten 10 komanda qatysty.
Birinshi kezeńde qazaqstandyq Aleksandr Ovsıannıkov márege ekinshi bolyp jetti. Al ekinshi kezeńde Alekseı Voloshın - kúmis, A. Ovsıannıkov qola medal jeńip aldy.
Osylaısha, úsh kúnge sozylǵan týr qorytyndysy boıynsha qazaqstandyq Aleksandr Ovsıannıkov chempıon atandy.
Atalǵan synda Qazaqstan namysyn Aleksandr Ovsıannıkov, Alekseı Voloshın, Arman Qamyshev, Aleksandr Semenov, Aspan Júkenov, Nıkıta Sokolov, Stepan Astafev qorǵaǵan bolatyn.
«Bul reıtıngilik týrnır. Atalǵan jarysta top jarǵan soń bizdiń elimizdiń upaıy artty. Velosportshylar barlyq nusqaýdy oryndap, sátti óner kórsetti», - dedi komanda jattyqtyrýshysy Vladıslav Gorbýnkov.
