«Qaplanbek»: Qazaqstan men Ózbekstan shekara beketindegi ahýal qalaı
ASTANA. KAZINFORM – Ádette Tashkentke baratyn Qazaqstan azamattarynyń negizgi legi «Jibek Joly – Gısht‑Kýprık» baqylaý-ótkizý pýnkti arqyly ótetin. Óńir turǵyndary «Chernıaevka» dep ataıtyn bul beket jabylǵaly júkteme «Kaplanbek – Navoı» ótkizý pýktine tústi. Kazinform tilshisi bul beketti jaıaý júrip ótip, mundaǵy jaǵdaıdy kózimen kórip qaıtty.
Kún saıyn Ózbekstanǵa elimizden 30-40 myń adam ótedi. Eki el arasyndaǵy kelisimge saı, Qazaqstan azamattary onda vızasyz 30 kún júre alady. Kópshiligi áýeli Tashkentke baryp, ary qaraı Hıýa, Buhara, Ferǵana jaqqa saparlap jatady.
Keıbireýler Almatydan Shymkentke ushyp baryp, sonan soń shekarany jaıaý kesip ótedi — bul tikeleı reıske qaraǵanda áldeqaıda arzan. Bul baǵyttyń shyǵyny az bolǵanymen, shekarada kútpegen jaǵdaı oryn alýy múmkin. Máselen, adamdar aptap ystyqta kezekte uzaq turyp qalýdan qorqady. Sebebi shekarany jaıaý kesip ótýshiler áýe reısin tańdaıtyndardan qashan da kóp bolady. Keıbir jaǵdaıda shekarada bıýrokratııa da úlken kedergi týdyrady. Sonyń kesirinen uzyn-sonar kezek qalyptasýy yqtımal.
Shekara mańy atmosferasy
Shymkentten Kaplanbekke deıingi jolǵa shamamen bir jarym saǵattaı ýaqyt ketedi. Joldyń keı bóligi aqyly jáne jyldamdyq shektelgen (110 km/saǵ). Al keı jerlerde jóndeý jumysy júrip jatyr, onda qozǵalys tipten baıaýlaıdy. «Qaplanbek» beketi «Jibek Joly» ótkizý pýnktinen shamamen 20 km áride ornalasqan, sondyqtan oǵan deıingi jolǵa da orta eseppen 15–20 mınýt artyq ýaqyt ketedi.
Shekara mańyndaǵy ómir múldem bólek, munda shilińgir ystyqta da tirshilik damyl tappaıdy. Shaǵyn marketter, kóshe kafeleri, sýsynǵa toly bóshkeler, klıentin alystan shaqyratyn taksı júrgizýshileri...
«Evrazııa‑S» JShS aýmaǵynda (8,6 ga) avtovokzal jáne kólik turaqtary ornalasqan. Onda 600 jeńil kólik, 50 avtobýs, 70 sprınter jáne 400 fýraǵa oryn bar. Munda 27 bólmeli jataqhana, 70–80 adamǵa arnalǵan ashana, dýsh bólmeleri, júzge jýyq saýda núktesi, jeke azyq‑túlik dúkenderi jáne aqyly (100 teńge) bes dárethana jumys istep tur.
Keden beketinen eki júz metr jerde Saryaǵash aýdandyq ortalyq aýrýhanasy men jekemenshik polıklınıka ornalasqan.
Joldyń eki beti tolǵan aıyrbastaý pýnktteri, olardyń sany 60-tan asady.
Qazaqstannyń bank kartalary Ózbekstanda qabyldanady, biraq kópshilik qolma‑qol aqsha alyp júrýdi jón kóredi.
Shekarany birden kesip ótýdi josparlamaǵan adamdardar qonaqúıde toqtaı alady. Munda táýligine 25000–37 000 teńge tólep jaıly qonaqúıge ornalasýǵa bolady. Іs-saparmen júrgen jandar úshin qujattar túgel rásimdeledi. Ony qymbat sanaǵan jandar úshin táýligine 20 000 teńge turatyn qonaq úı de bar, ol shamamen 1 shaqyrym shetkerirek jerde tur.
Eń únemdi nusqa — bir bólmeli páter jaldaý. Bul mańda onyń baǵasy táýligine 10 000–15 000 teńge turady.
Ótkizý pýnkti
Shekaraǵa bir ǵana jol bar — onymen jaıaý júrginshiler, kólikter jáne avtobýstar birge ótedi. Adam aǵyny kóp kezde bul baǵyt qanshalyqty qaýipsiz degen suraq týyndaıdy. Biraq biz barǵan kúni baqylaý-ótkizý pýnktiniń (BÓP) mańy ádettegiden áldeqaıda tynysh boldy. Shekaradan jıi ótetinderdiń aıtýynsha, merekelik kúnder qarsańynda jáne mıgranttardyń úlken legi ótetin kezderde munda úlken keptelis bolady.
Shekaradan ótý
Shekarashylar adamdardy sabyrly keıippen sypaıy qarsy alady. Jaıaý adamdar torly túnel arqyly pasportty tekserý aımaǵyna ótedi. Oń jaqta kólikter men avtobýstarǵa arnalǵan jol bar.
Bir–eki mınýttan soń pasportty baqylaý ornyna jetesiń. Termınaldar bólek-bólek tur — Qazaqstan azamattaryna bir qatar, sheteldikterge bir qatar arnalǵan. Munda kondıtsıoner jumys isteıdi, al keden beketi qyzmetkerleriniń ústinde shaǵyn jeldetkishter ornatylypty.
Pýnkt yńǵaıly: dárethana, medıtsınalyq qyzmetker bólmesi bar.
Memlekettik kirister komıtetiniń málimetinshe, «Qaplanbek» BÓP-de pasportty tekserýge arnalǵan 59 tereze jumys isteıdi: Qazaqstanǵa kirý úshin — 30, shyǵý úshin — 29. Biz ótken kezde Qazaqstan azamattary úshin 8, sheteldikter úshin 7 tereze ashyq turdy.
Kezek te kóp emes — ár terezede 4‑5 adamnan. Ár adamǵa shamamen bir mınýttan astam ýaqyt ketedi — rásimdeý tez júrgizilip jatty.
Ózbekstan jaǵynda pasport skanerge salynǵan soń kamera adamnyń júzin tekseredi. Eger málimet sáıkes bolsa, «Navoı» pýnktiniń shyǵys esigi ashylady. Meni elektrondyq júıe tanı almady, sondyqtan bólek terezege baryp, ofıtser foto boıynsha sáıkestendirip, mór basty.
Eki shekarany ótýge shamamen 25 mınýt ketti.
Kedennen soń
Kazaqstan jaǵyndaı, Ózbekstan jaǵynda da kóshe saýdasy qyzyp tur: tandyr nan, samsalar, oıynshyqtar, SIM‑kartalar satylady, taksıster de tolyp tur.
Keri jol
Qazaqstanǵa qaıtý sál uzaǵyraq ýaqyt aldy. Tústen keıin aǵyn kóbeıdi. Ásirese balaly otbasylar kóp boldy, olardyń kóbi qydyryp qaıtyp bara jatqandar eken. Degenmen rásimdeý tez jasaldy — qyzmet kórsetýdiń tártibi sol: pasport, kamera, mór. Barlyǵy 30 mınýt shamasynda aıaqtaldy.
«Qaplanbek – Navoı» BÓP arqyly jaıaý ótý esh qolaısyzdyq týdyrmady. Eń bastysy — durys ýaqytty tańdaý jáne kezek bola qalǵan jaǵdaıda sabyr saqtaý.
Eske sala ketsek, jyl basynda jóndeý jumysyna baılanysty «Jibek Joly» ótkizý pýnkti jabyldy. https://kaz.inform.kz/news/zhbek-zholi-otkzu-punkt-zhabiladi-e93ed1/
Resmı málimetter boıynsha, «Jibek Joly» beketi 2026 jylǵa deıin jabyq bolady.
— Qazaqstan men Ózbekstan shekarasynda qazirgi sátte kelesi ótkizý pýnktteri jumys isteıdi: «B. Qonysbaeva», «Atameken», «Qazyǵurt», «Saryaǵash stansasy», «Syrdarııa», «Tselınnyı», «Tájen» jáne «Beıneý». «B. Qonysbaeva», «Kaplanbek», «Syrdarııa», «Tselınnyı», «Saryaǵash stansasy» jáne «Beıneý» shekaralyq ótkelderi jeke tulǵalar men týrıster úshin qoldanylady, — deıdi QR Qarjy mınıstrligi Memlekettik kirister komıteti.
Jaz mezgilinde ortasha táýliktik aǵyny (eki jaqqa):
- «Kaplanbek» — shamamen 38 000 adam;
- «B. Qonysbaeva» — shamamen 3 300 adam;
- «Syrdarııa» — 1 300 adam;
- «Tselınnyı» — 1 100 adam;
- «Saryaǵash stansasy» — 145 adam;
- «Beıneý» — 1 100 adam.
— Shekaradan tez arada ótkisi keletinderge «B. Qonysbaeva», «Syrdarııa», «Tselınnyı», «Saryaǵash stansasy» jáne «Beıneý» beketterin tańdaýǵa keńes berermiz, óıtkeni onda júktelme az jáne shekaradan ótýge az ýaqyt ketedi, — deıdi Memlekettik kirister komıtetinen.