Kapıtolııge shabýyl jasaǵan 53 adamnyń isin AQSh soty qarap jatyr
NUR-SULTAN. QazAqparat – Kolýmbııa okrýginiń federaldy soty 2021 jyldyń 6 qańtarynda AQSh Kongresine shabýyl jasaǵan 13 adamǵa qatysty aıyptaýdy qarastyryp jatyr. Taǵy shamamen 40 adamnyń isi Kolýmbııa okrýginiń Joǵarǵy sotyna ketti. Bul týraly AQSh Ádilet mınıstrligi málimdedi, dep habarlaıdy QazAqparat «Amerıka daýysy» basylymyna silteme jasap.
Olar Kapıtolııge zańsyz ári qarýmen basyp kirip, komendanttyq saǵatty buzǵany jáne basqa da baptar boıynsha aıyptalyp otyr.
«AQSh-tyń Kapıtolıı ǵımaratyna basyp kirý – elimizdiń negizgi ınstıtýttarynyń birine jasalǵan shabýyl. Bizdiń mekeme basqa da quqyq qorǵaý organdarymen birlese otyryp AQSh-tyń Kapıtolıı ǵımaratyna shabýyl jasaǵan azamattardy anyqtap, tutqyndap, zań júzinde jazalaý úshin jedel áreket etip, bar kúshin jumsaıdy» dep málimdedi AQSh prokýrorynyń mindetin atqarýshy Maıkl Shervın.
FBR AQSh Kongresiniń aýmaǵyna jarylǵysh zat alyp kirgen adamdar týraly aqparat bergenderge 50 myń dollar syıaqy beremiz dep jarııalady.
Vashıngton polıtseıleriniń habarlaýynsha, Kapıtolııge shabýyl jasaǵan adamdar týraly málimetim bar degen azamattardan 17 myńǵa jýyq habarlama túsken.
