Kapıtolııge shabýyl: AQSh-tyń burynǵy prezıdentteriniń pikiri
VAShINGTON. QazAqparat – AQSh-tyń burynǵy prezıdentteri Barak Obama, kishi Djorj Býsh, Bıll Klınton jáne Djımmı Karter sársenbi kúni Kapıtolııge jasalǵan shabýyl men AQSh Kongresi ǵımaraty aldyndaǵy narazylyqty aıyptady. Osy oqıǵalardyń saldarynan 4 adam kóz jumdy, dep habarlaıdy QazAqparat tilshisi Politico-ǵa silteme jasap.
Barak Obama Kapıtolııge shabýyldy «uly arsyzdyq pen uıatsyzdyq» retinde el esinde qalatynyn málimdedi. Al ózinen keıingi prezıdent Donald Trampty osy úshin jaýapty ekenin basa aıtty.
«Tarıh is basyndaǵy prezıdenttiń ıtermeleýimen bolǵan Kapıtolııdegi búgingi qatygezdikti este saqtap qalady. Ol bizdiń ult úshin aıtarlyqtaı arsyzdyq pen uıatsyzdyq kezinde legıtımdi saılaýdyń nátjesi týraly negizsiz ótirik aıtýmen boldy», - dep jazdy Obama Twitter-de.
Ol sonymen qatar Respýblıkalyq partııa men oń júıedegi BAQ-ty taıaýda ótken saılaý nátıjelerine kúmán keltirgeni úshin aıyptady.
«Bul jıirkenishti ári janǵa batarlyq jaǵdaı. Saılaýdyń nátıjesine bulaısha demokratııalyq elderde emes, banandy respýblıkalarda ǵana daý aıtady», - dep jazdy AQSh-tyń burynǵy prezıdenti kishi Djorj Býsh.
Kishi Djorj Býsh sonymen qatar Kapıtolıı ǵımaratyna basyp kirip, sonda birneshe saǵat ótkizgen adamdar «ótirik pen jalǵan úmittiń» jeteginde bolǵanyn atap ótti.
«Men saılaýdan keıin keıbir saıası kóshbasshylardyń albyrt áreketteri men bizdiń dástúrlerge, quqyq qorǵaý organdaryna degen bassyzdyqqa tańǵalyp otyrmyn», - deıdi AQSh-tyń 43-shi prezıdenti.
Kishi Býsh sonymen birge taıaýda ótken saılaýdyń qorytyndysyna kóńili tolmaıtyn azamattardy amerıkalyq demokratııa úshin otstavkaǵa ketýge shaqyrdy.
«Qazirgi saıasattan góri memleketimizdiń quny joǵary. Halyq saılap alǵan laýazymdy tulǵalar ǵana óz mindettemelerin oryndap, beıbitshilik pen qaýipsizdik úshin eńbek etsin», - dedi ol.
Óz kezeginde eks-prezıdent Bıll Klınton Kapıtloııdiń birneshe bóligin basyp alý áreketin «ýly saıasattyń» apatty nátıjesi jáne taralǵan jalǵan aqparattardyń saldary dep atady. Biraq ol bul oqıǵa Amerıka halqynyń tártipke degen túpkilikti senimine selkeý túsirmegenin qosty.
Burynǵy prezıdent Djımmı Karter de bolǵan oqıǵany aıyptap, Kapıtolııge shabýylda «ulttyq tragedııa» dep atady. Amerıkanyń burynǵy basshysy sonymen qatar burynǵy birinshi ledı Rozalın Karter ekeýi zorlyq-zombylyq úshin ýaıymdap otyrǵanyn, amerıkalyqtar qaqtyǵystyń retke keltirilýin tileıtinin jetkizgen.
Eske salaıyq,sársenbi kúni AQSh Kongresi saılaýshylardyń daýysyn eseptep, 2020 jylǵy prezıdent saılaýynyń qorytyndysyn shyǵarý úshin jınalǵan bolatyn. Saılaýda demokrattar partııasynyń ókili Djo Baıden jeńiske jetken edi.
Alaıda, buǵan deıingi prezıdent Donald Tramptyń jaqtastary jappaı narazylyq aktsııasyn bastap, olardyń bir toby kongress ǵımaratyna basyp kirdi.
Tún jarymyna qaraı AQSh kongresin jáne Senatyn kúzetetin polıtsııa Tramptyń jaqtastaryn Kapıtolıı aýmaǵynan tyqsyryp shyǵardy. Senat ǵımaratyn AQSh ulttyq ulanynyń jasaǵy kúzetýde.
Vashıngtonda komendanttyq saǵat engizildi.
Keıin Instagram, Facebook, Twitter jáne Youtube Donald Tramptyń akkaýntyn blokqa qoıdy.
Narazylyq aktsııasynan soń AQSh Kongresi daýystardy sertıfıkattaýdy qaıta jalǵastyryp, onyń qorytyndysymen el prezıdenttigine úmitker Djo Baıdenniń saılaýdaǵy jeńisin resmı túrde rastady. «AQSh Kongresi Baıdenniń jeńisin bekitti. Formaldi protsedýra uzaqqa sozylyp ketti, alaıda barlyǵy saqtaldy. Tańerteń saǵat úsh jarym kezinde vıtse-prezıdent Maık Pens otyrysty jabyq dep jarııalady», - dep jazǵan bolatyn VVS agenttigi.
78 jastaǵy Djo Baıden Amerıkanyń 46-ynshy prezıdenti boldy. Inaýgýratsııa 20 qańtarǵa josparlanǵan.
