Kapıtal tartý, memleket qarjylandyrýyn azaıtý – Otbasy bank pen Halyqaralyq qarjy korporatsııasy kelisim ornatty
ASTANA. KAZINFORM – Astana halyqaralyq forýmy sheńberinde Dúnıejúzilik bank tobyna kiretin Halyqaralyq qarjy korporatsııasy (IFC) men «Otbasy bank» AQ arasynda keńes berý qyzmetterin kórsetý týraly kelisimge qol qoıyldy.
Kelisimge sáıkes, IFC qazaqstandyq banktiń ortamerzimdi damý strategııasyn iske asyrýdyń egjeı-tegjeıli josparyn ázirleý boıynsha konsýltatsııalyq qyzmetter kórsetedi.
Bul ýaǵdalastyq operatsııalyq modeldi kúsheıtý jáne jetildirý úshin, onyń ishinde memlekettik qarjylandyrýǵa táýeldilikti tómendetý maqsatynda syrtqy kapıtaldy tartý tásilderin de qamtıdy. Sondaı-aq, jumys josparyna jańa qarjy ónimderin ázirleý jáne banktiń qarjy naryǵyndaǵy básekege qabilettigin kúsheıtý tetikteri kiredi.
Saltanatty qol qoıý rásimine Otbasy bankiniń Basqarma tóraǵasy Lázzat Ibragımova, "Báıterek" UBH" AQ Basqarma tóraǵasynyń orynbasary Jandos Shaıhy men Túrkııa jáne Ortalyq Azııa boıynsha IFC dırektory Vıbke Shlemer qatysty.
− IFC-men kelisimge qol qoıý – bizdiń strategııalyq transformatsııamyzdaǵy mańyzdy qadam. Biz turǵyn úıdi nesıeleý salasynda kóshbasshy bolyp qana qoımaı, naryqtaǵy senim men turaqtylyqtyń jańa deńgeıin ornatqymyz keledi. Qazir banktiń qarjylyq kórsetkishteri ósken. Mysaly, taza paıda 2020 jyly 31,7 mlrd teńgeden 2024 jyly 120,8 mlrd teńgege deıin ulǵaıdy. Bank aktıvteri de 2,5 esege – 2020 jyldyń aıaǵyndaǵy 1,7 trln teńgeden 2024 jyldyń aıaǵyndaǵy 4,2 trln teńgege deıin ósti. Biz 592 myńnan astam otbasyǵa qonys toıyn toılaýǵa kómekteskenimizdi maqtan tutamyz. IFC-men yntymaqtastyq aldymyzda jańa kókjıekter ashady. Biz ınnovatsııalardy engizýdi, qyzmetter spektrin keńeıtýdi jáne tıimdilikti arttyrýdy josparlap otyrmyz, osylaısha azamattar armandaǵan óz baspanasyn ala alady, − dep atap ótti Otbasy bankiniń Basqarma tóraǵasy Lázzat Ibragımova.
Bul rette L. Ibragımova IFC dırektoryn qyrkúıek aıynda Almatyda ótetin turǵyn úı naryǵyn qarjylandyrý tetigine arnalǵan úlken halyqaralyq konferentsııaǵa shaqyrdy.
− Biz úshin jáne klıentterimiz úshin tek klassıkalyq turǵyn úı jınaq júıesimen, ıaǵnı adamnyń uzaq ýaqyt boıy 50 paıyzǵa deıin qarajat jınaýymen shektelmeı, baspana máselesin sheshetin basqa da quraldardyń bolýy óte mańyzdy. Sondyqtan Halyqaralyq qarjy korporatsııasynyń AQSh-tan bastap Sıngapýrǵa deıingi túrli elderde jumys isteıtin sarapshylary men keńesshileriniń tájirıbesin eskerip, óz ónimderimizdi jetildirý múmkindikterin qarastyrýdamyz. Halyqaralyq uıymnyń osy tájirıbesi bıyl qyrkúıekte Almatyda ótetin úlken halyqaralyq konferentsııada Otbasy bankine jeke kapıtal tartý, memlekettik qarjylandyrý úlesin birtindep qysqartý jáne árbir qazaqstandyqtyń Otbasy bankiniń múmkindikterin paıdalanyp, baspana alýyna jol ashatyn sheshimder týraly aıtýǵa múmkindik beredi dep oılaımyn, − dedi Lázzat Ibragımova.
Óz kezeginde V. Shlemer Qazaqstannyń turǵyn úı qurylysy men ıpotekalyq qarjylandyrý sektorynyń mańyzdylyǵyna erekshe mán berip, oǵan kóńil bólip kele jatqanyn atap aıtty.
− Turǵyn úı sektory – el halqy úshin asa mańyzdy. Túrli elderde jumys istegen tájirıbeme súıene otyryp aıta alamyn, keı elderdiń ekonomıkasy damyp jatsa da, tıimdi jumys isteıtin ıpotekalyq qarjylandyrý júıesi joq. Qazaqstanda mundaı myqty irgetastyń, tıimdi bıznes-modeldiń bar ekeni qýantady. Endi sizder munymen shektelip qalmaı, ári qaraı damýǵa qadam jasap, qolda bar resýrstar men aktıvterdi barynsha tıimdi paıdalaný úshin kapıtal tartý joldaryn qarastyryp otyrsyzdar. Bul tásil bizdiń uıymnyń strategııasymen tolyq úndesedi. Biz seriktestik ornata alatyn ınstıtýttardyń kóbeıgenin kórip otyrmyz, bul tek óz qarjymyzdy paıdalanyp qana qoımaı, túrli jekemenshik kózderden uzaq merzimdi kapıtal tartýǵa da múmkindik beredi, − dedi Vıbke Shlemer.
Aıta keteıik, Halyqaralyq qarjy korporatsııasy (IFC) – damýshy elderdegi jeke sektorǵa baǵyttalǵan iri jahandyq damý ınstıtýty. Ol qarjylandyrýǵa qoljetimdilikti arttyrý, turaqty ekonomıkalyq ósýdi yntalandyrý jáne qarjylyq ınklıýzııany damytý maqsatynda búkil álemdegi qarjy ınstıtýttarymen belsendi jumys isteıdi.
IFC konsýltatsııalyq baǵdarlamalaryna qarjy ınstıtýttaryna korporatıvtik basqarý tájirıbesin, nesıelik syn-qaterdi baǵalaý protsedýralaryn jetildirýge jáne ınnovatsııalyq qarjylyq ónimder men qyzmetterdi ázirleýge kómektesý kiredi. 2024 jyly IFC damýshy elderdegi jeke kompanııalar men qarjy ınstıtýttaryna jeke sektordyń sheshimderin qoldanyp, kedeılikten azat álem qurý úshin jeke kapıtaldy jumyldyra otyryp, rekordtyq 56 mıllıard dollar bólgen.
Al Otbasy bank jýyrda 3 mıllıonynshy depozıttiń ashylǵanyn atap ótti. 2025 jyldyń 5 aıynda depozıtter boıynsha 454,9 mlrd teńge túsim túsken. Bul ótken jyldyń sáıkes kezeńimen salystyrǵanda 38,5%-ǵa kóp. Bank klıentteri óz únemdiliginiń arqasynda jınaq shottarynda 2,4 trln teńge qarajat jınaǵan. Qazir elimizdiń árbir úshinshi ekonomıkalyq belsendi turǵyny «Otbasy bankindegi» depozıtke qarajat jınaıdy.
Jyl basynan beri bank 534,8 mlrd teńge qaryz berip, 26 331 qazaqstandyqqa turǵyn úı máselesin sheshýge kómektesken. Bul ótken jyldyń sáıkes kezeńimen salystyrǵanda 38,3%-ǵa joǵary.