Qapyryq ystyq, jel: 25 maýsymǵa arnalǵan aýa raıy boljamy

ASTANA. KAZINFORM — Qazgıdromet sınoptıkteri 25 maýsym, seısenbige arnalǵan aýa raıy boljamyn jarııalady. 

Soltústik-batys tsıklony jáne onymen baılanysqan atmosferalyq fronttar Qazaqstan terrıtorııasy arqyly jyljı otyryp, naızaǵaı men jańbyr, elimizdiń batysyna qatty jańbyr ákeledi.

Respýblıka boıynsha jel kúsheıdi.

Batys, soltústik-batys, soltústik pen shyǵysta daýyl turyp, burshaq jaýady. 

Ońtústik-batysta túnde jáne tańerteń tuman túsedi.

Kúndiz Abaı, Jetisý, Almaty, Jambyl, Shyǵys Qazaqstan oblystarynda qatty ystyq saqtalady, Mańǵystaý oblysynyń ońtústiginde de aptap ystyq bolady. 

Aqtóbe, Almaty, Ulytaý, Abaı, Qaraǵandy, Aqmola, Shyǵys Qazaqstan, Mańǵystaý, Jetisý, Pavlodar, Atyraý oblystarynda joǵary órt qaýpi bar. 

Atyraý, Túrkistan, Jambyl, Qyzylorda, Ulytaý oblystarynda, Almaty oblysynyń soltústik jartysynda, Mańǵystaý oblysynyń soltústiginde, ońtústik-shyǵysynda, ortalyǵynda, Aqtóbe oblysynyń batysynda, ońtústiginde, Batys Qazaqstan, Qostanaı, Qaraǵandy, Abaı oblystarynyń ońtústiginde, Jetisý oblysynyń soltústiginde, shyǵysynda tótenshe órt qaýpi saqtalady.