Qapalda týrısterge tap bergen kúdiktiler ustaldy - ákimdik
TALDYQORǴAN. QazAqparat - Almaty oblysy ákiminiń baspasóz hatshysy Ǵalymurat Júkel Qapalda týrısterge tap bergen kúdiktilerdiń ustalǵanyn málim etti, dep habarlaıdy QazAqparat tilshisi.
«Іshki ister organyna aryz týrıster tarapynan tústi. Olar quzyrly organǵa shaǵymdanyp, aryz jazdy. Qazir kúdiktiler ustaldy. Atap aıtqym keledi, týrısterdiń janynda shet el azamattary da bolǵan. Biraq olar zardap shekken joq. Kıkiljiń Qazaqstan azamattarynyń, naqtyraq aıtqanda Almaty qalasynan kelgen saıahattaýshylar men Qapal aýyly turǵyndarynyń arasynda bolǵan», - dedi Ǵalymurat Júkel.
Esterińizge sala keteıik, buǵan deıin Almaty oblysyndaǵy Aqsý aýdanyna qarasty Qapal aýylynda týrısterge jergilikti turǵyndardyń tap bergenin habarlaǵan bolatynbyz. Zardap shekken saıahattaýshylardyń beti kógerip, olar aýrýhanaǵa júgingen. Biraq olardy emdeý mekemesine jatqyzý qajettiligi týyndamaǵan. Oqıǵa 16 tamyz kúni keshki segizder shamasynda bolǵan.
Atalǵan faktige baılanysty QR QK 293-baby boıynsha is qozǵaldy.
