Qapalda týrısterdiń soqqyǵa jyǵylýyna qatysty ákimdik pikir bildirdi
QAPAL. QazAqparat - Almaty oblysynda saıahattap júrgen týrısterge Qapal aýylynyń jergilikti turǵyndary tap berip, soqqyǵa jyqqan. Oqıǵa bolǵan sáttegi beınejazbany týrısterdiń biri agenttik tilshisine joldady, dep habarlaıdy QazAqparat tilshisi.
43 sekýndtqa túsirilgen vıdeoda belgisiz azamattyń kóliktiń ishine kirip, adamdarǵa bylapyt sózder aıtyp, balaǵattap jatqanyn kórýge bolady.
«Biz Qapal aýylyndaǵy dúkenge sýsyn alýǵa kirgenbiz. Іshimdik iship alǵan jigitter kelip, bizge jónsiz tıse bastady. Sońynda olardyń sany tipten kóbeıip ketti. Ózimiz túsinbeı qaldyq ne bolǵanyn. Biz olarmen tóbelesken joqpyz. Al bizge tap bergen jigitter ishimdik iship alǵan. Qazir birneshe týrıstiń betteri kógerip qaldy»,- dedi atyn atamaýdy ótingen týrısterdiń biri, oqıǵa kýágeri.
Qazir týrıster saıahattaryn Sarqan aýdanynda jalǵastyrýda. Úreılenip qalǵan olar budan bylaı Qapal aýylyna barmaıtyndaryn jetkizdi.
Al Almaty oblystyq ІІD baspasóz qyzmeti atalǵan fakti boıynsha is qozǵalǵanyn rastady.
Esterińizge sala keteıik, biz buǵan deıin Almaty oblysynda saıahattap júrgen týrısterge Qapal aýylynyń jigitteri tap bergenin habarlaǵan bolatynbyz. Artynsha Aqsý aýdandyq aýrýhanasyndaǵylar týrısterdiń densaýlyǵy jaıly málimet berdi.
«6 adam keldi. Aıaq-qoldary, dene músheleri synbaǵan. Bet aýyzdary qatty kógermegen. Medıtsınalyq saraptama jasaldy. Barlyǵy Almaty qalasynyń turǵyndary. Týrısterdiń eshqaısysy ishimdik ishpegen», - degen edi Aqsý aýdandyq aýrýhanasyndaǵylar.
"Atalǵan fakti boıynsha QR QK 293-baby boıynsha is qozǵalǵan. Týrıster aýrýhanaǵa júgindi, biraq olardy emdeý mekemesine jatqyzý qajettiligi týyndamady",- dedi Almaty oblysy ákiminiń baspasóz hatshysy Ǵalymurat Júkel.
