Qanysh Sátbaevtyń eńbegine arnalǵan halyqaralyq konferentsııa ótti
Іs-shara «Rýhanı jańǵyrý» baǵdarlamasy aıasynda QR Ulttyq ǵylym akademııasynda ótti. Jıyn bastalmas buryn sharaǵa jınalǵan ǵylymı ınttellıgentsııa, Parlament Májilisiniń depýtattary, qala ákimdiginiń ókilderi jáne akademıktiń týys-týǵandary Qanysh Sátbaevtyń eskertkishine gúl shoqtaryn qoıdy.
Halyqaralyq ǵylymı konferentsııa barysynda Q.Sátbaevtyń ǵylymǵa qosqan orasan eńbegi týraly aıtyldy. Tarıh ǵylymdarynyń doktory, Shoqan Ýálıhanov atyndaǵy tarıh jáne etnologııa ınstıtýtynyń dırektory Zııabek Qabyldınov belgili ǵalym, sondaı-aq Qazaqstandaǵy kóptegen ǵylymı zertteý ınstıtýttarynyń negizin qalaǵanyn tilge tıek etti.
«Qazir komıtet qurylymynda 40-qa jýyq ǵylymı-zertetý ınstıtýty jumys istep jatsa, olardyń qyzmetiniń negizin qalaǵan Qanekeń. Onyń ólsheýsiz eńbeginiń arqasynda akademııa búkil TMD elderine belgili ǵylymı ordaǵa aınaldy. Ol Eýropa, Azııa, Amerıka ǵalymdarymen ǵylymı baılanys ornatty», - dedi ol.
QR UǴA akademıgi, geologııa-mıneralogııa ǵylymdarynyń doktory Sultan Ozdoev atap ótkendeı, Qanysh Sátbaev álemdegi iri mys jáne ýran kenishiniń ashylýyna septigin tıgizdi.
«Ol birinshi bolyp Atbasar tresin basqardy. Týra osy kezden bastap geologııa Qazaqstanda qaryshtap damı bastady. Ol negizinen Jezqazǵan mys ken ornynyń ashylýyna barynsha eńbek etti, marganets keniniń de ornyn tapty. Qanysh Sátbaevtyń artynda 3 murasy - Ǵylym akademııasy, Geologııalyq ǵylym ınstıtýty, Jezqazǵan mys óndirý ken orny qaldy», - dedi Sultan Ózdoev.
Onyń aıtýynsha, belgili ǵalymnyń esimi Qazaqstan tarıhynda altyn árippen jazylyp qaldy. Eldiń kóptegen qalalarynda onyń atymen mektepter, kósheler, zertteý ınstıtýttary atalǵan.
