Qańyrap turǵan tramvaı deposynyń ornynda jastar ortalyǵy boı kóterýi múmkin
ALMATY. QazAqparat - Almatyda 2,1 ga aýmaqty alyp jatqan burynǵy tramvaı deposynyń ornyna jastar haby boı kóterýi yqtımal. Atalǵan jobany Almaty qalasy qoǵamdyq keńesinde Ýrbanıstıka ortalyǵynyń dırektory Natalıa Lıvınskaıa tanystyrdy.
Aıta ketý kerek, buǵan deıin tramvaı deposynyń ornynda qandaı nysan salý máselesi sheshilmeı kelgen edi. Ótken jyly tamyzda Ýrbanıstıka ortalyǵy atalǵan taqyrypta qoǵamdyq baıqaý ótkizdi. Ortalyq dırektory N.Lıvınskaıanyń aıtýynsha, 22 jobanyń ishinen eń kóńilge qonymdysy qalalyq Jastar ortalyǵynyń jobasy bolyp shyqty.
«Arhıtektýralyq jaǵynan tıimdi, qarjylyq-ekonomıkalyq turǵydan túsinikti, naqty joba osy boldy. Qazir biz Jastar basqarmasymen birige otyryp naqtyraq jumys jasap jatyrmyz. Joba quny shamamen 1 mlrd teńge bolady. Bul qarjyǵa jobalaý, qurylys, abattandyrý jumystary kiredi», - dedi N.Lıvınskaıa.
Al qalalyq Jastar saıasaty máseleleri jónindegi basqarma basshysy Shyńǵys Beskempirov atalmysh ortalyq týraly tolyǵyraq toqtaldy.
«Bul óz kezeginde jastardyń Loft-ortalyǵy bolmaq. Munda sportshy jastar da, túrli sýbmádenıet ókilderi de keletin bolady. Ǵımarattyń eń ortasynda kovorkıng ortalyq ornalasady. Shyǵarmashylyqpen aınalysatyn jastarǵa kórme zaly, konferents-zaldar, jastar uıymdaryna arnalǵan keńseler salynady. Jastar uıymdarynyń qazir jınalyp otyratyn jerleri joq qazir. Sondaı-aq, jastarǵa arnalǵan bıznes, turǵyn úı boıynsha keńes oryndary ashylady. Mamandyq izdegen jastarǵa qyzmet portaly kómektesedi. Barlyq bos jumys oryndaryn osynda jınaqtaımyz. Sondaı-aq, stýdent jataqhanalaryna kýrator ortalyǵyn ashamyz. Keler jyldyń aıaǵyna deıin jastar habyn quramyz josparlap otyrmyz. Onda tek qaladaǵy jastar ǵana emes, bazarda júrgen jastardy da tartýǵa tyrysamyz», - dedi Beskempirov Shyńǵys.
Aıta ketý kerek, bul joba Qoǵamdyq keńestiń maquldaýynan keıin Qalalyq keńestiń talqylaýyna túsedi.
