Kanvon Olımpıadasy nesimen este qaldy
ASTANA. KAZINFORM – Búgin Ońtústik Koreıanyń Kanvon qalasynda ótip jatqan IV qysqy jasóspirimder Olımpıadasyny máresine jetip, tarıh qoınaýyna jol tartty.
Bul Olımpıada oıyndary qazaq jankúıerleri úshin tarıhı altyn medal jeńip alǵan jarqyn sátterimen máńgi este qalmaq. Olaı deıtinimiz 2012 jyly Insbrýkte (Aýstrııa) ótken oıyndarda, 2012 jylǵy Insbrýk (Aýstrııa) Olımpıadasynda jáne 2020 jyly Lozanna (Shveıtsarııa) Olımpıadasynda qazaq eliniń sportshylary jeńis tuǵyrynyń eń bıik satysyna kóterilip, Ánuranymyzdy áýelete almaǵan edi. Tipti, Lozannada birde-bir júldege qol jetkize almadyq.
Endi sózimizge dálel bolý úshin ár Olımpıadaǵa qysqasha jeke-jeke taǵy bir toqtala keteıik.
2012 jyl: Insbrýk (Aýstrııa) Olımpıadasy
Bul Qazaqstan quramasynyń qysqy jasóspirimder Olımpıadasyna alǵash ret qatysýy bolatyn. Nátıjesinde sportshylarymyz Insbrýkte 1 kúmis jáne 2 qola medalǵa qol jetkizdi. Jalpy komandalyq esepte 23-orynǵa taban tiregen edi. Onda Galına Vıshnevskaıa-Sheporenko sprıntte kúmis júlde, sosyn iz kesý saıysynda qola medalǵa qol jetkizdi.
Al Sergeı Malyshev klassıkalyq júrispen 10 shaqyrym jarysta máre syzyǵyn úshinshi bolyp kesip, qola júlde alyp qaıtty.
2016 jyl: Lıllehammer (Norvegııa) Olımpıadasy
2016 jyly Lıllehammerde jerlesterimiz Olımpıadany 2 qola medalmen aıaqtady. Nátıjesinde, jalpy komandalyq esepte 26-orynǵa taban tiredi.
Norvegııa tórinde bir qola júldeni bıatlonshy Arına Pantova sprıntte jeńip alsa, ekinshi júldeni el qorjynyna Elızabet Tursynbaeva mánerlep syrǵanaý sportynan saldy.
2020 jyl: Lozanna (Shveıtsarııa) Olımpıadasy
Qazaq sportshylary úshinshi ret ótken Lozanna oıyndary qazaq sportshylary úshin eń sátsiz boldy. El namysyn qorǵaýǵa barǵan 26 atletimizdiń birde-biri jeńis tuǵyrynan kórine almady.
2024 jyl: Kanvon (Ońtústik Koreıa) Olımpıadasy
Búgin máresine jetken Kanvon-2024 jasóspirimder arasyndaǵy IV qysqy Olımpıada oıyndary bizge tarıhı jetistigimen máńgi esimizde qalyp otyr. Atalǵan dodada Qazaqstan jasóspirimder quramasy sapynda 41 sportshy 5 sport túrinen baq synap, 55 júlde jıyntyǵyn sarapqa saldy.
Nátıjesinde 1 altyn, 2 qola medalmen jalpy komandalyq esepte 20-orynǵa qol jetkizdi.
Tuńǵysh altyn medaldi shańǵymen tuǵyrdan sekirýden Qazaqstan komandasynyń múshesi Ilıa Mızernyh jeńip alsa, qola medaldiń birin short-trekten 1 000 metr qashyqtyqta synǵa túsken sportshylarymyz Polına Omelchýk qanjyǵasyna baılady. Al ekinshi qola júldeni Qazaqstan qorjynyna hokkeıshilerimiz saldy.
