Kanvon-2024: Ońtústik Koreıaǵa baratyn elordalyq sportshylar belgili boldy

Qańtardyń 19-y men aqpannyń 1-i aralyǵynda Ońtústik Koreıanyń Kanvondo provıntsııasyndaǵy Kannyn qalasynda IV qysqy jasóspirimder Olımpıadasy ótedi. Oǵan baratyn qazaqstandyq sportshylardyń arasyndaǵy elordalyqtardyń tizimi belgili boldy. Kazinform bul týraly Astana ákimdiginiń resmı saıtyna silteme jasap habarlaıdy. 

QR Týrızm jáne sport mınıstrligi Sportty damytý dırektsııasynyń baspasóz qyzmetiniń málimetinshe, bul jarysta el namysyn 42 otandasymyz 10 sporttyq baǵdarlama boıynsha qorǵaıdy. Al, delegatsııa sapynda resmı ókilder, bapkerler, dárigerler men BAQ ókilderin qosqanda 80-nen astam adam bar. 

Azııa qurlyǵy alǵash ret qabyldaıtyn jasóspirimder oıyndarynda Qazaqstan ulttyq qurama sapynan Astana qalasynyń sportshylary da boı kórsetti. Elordalyq jas órender dúbirli dodada kerlıng, konkımen júgirýden jáne shańǵy jarysy boıynsha baqtaryn synaıdy. 

Kerlıng:

Mereı Tastemir;

Ibragım Tastemir.

Shańǵy jarystary:

Berik Boranbaev.

Konkımen júgirý sporty:

Rýslan Janadilov.

Baıraqty báseke kezinde 81 Ulttyq Olımpıada komıtetinen kelgen 1 900-ǵa jýyq atlet sporttyń 7 túrinen 15 sporttyq baǵdarlama boıynsha baqtaryn synaıdy. 

Aıta ketelik, Kanvondo Olımpıadasyna baratyn sportshylardy irikteý jarystary el ishinde 2023 jyldyń basynan beri ótken. Sonyń negizgisi QR-nyń IV qysqy Jastar sport oıyndary sanalady. Bas-aıaǵy 3 aıǵa sozylǵan sol synda 11 baǵdarlamada úzdikter anyqtalǵan (bıatlon, kerlıng, konkımen júgirý, short-trek, shańǵy jarystary, mánerlep syrǵanaý, frıstaıl-mogýl jáne frıstaıl-akrobatıka, shaıbaly hokkeı, shańǵymen tuǵyrdan sekirý). 

Aıta keteıik, ashylý rásimi 19 qańtarda Gangneung Oval jáne PyeongChang Dome stadıondarynda bir mezette qatar ótedi.