Kanvon-2024 Olımpıada oıyndarynyń alaýy tutandy
KANVON. KAZINFORM – Búgin Ońtústik Koreıanyń Kanvon qalasynda IV qysqy jasóspirimder Olımpıadasynyń resmı ashylý saltanaty ótip, alaýy tutandy. Alaýdy jaǵý qurmeti jergilikti jas frıstaılshy, Kanvon-2024 oıyndarynyń qatysýshysy Chon Mın Lıge buıyrdy.
Olımpıadanyń saltanatty ashylý rásimi Kannyn qalasyndaǵy «Gangneuung Oval» sport kesheninde 8 myń kórermenniń qatysýymen ótti jáne keremet qoıylymdarǵa toly boldy.
Ońtústik Koreıa prezıdenti ıÝn Sok El quttyqtaý sóz sóılep, sportshylarǵa sáttilik tiledi.
Al Halyqaralyq Olımpıada komıtetiniń prezıdenti Tomas Bah jastardy erejeni saqtap, syılastyqta bolýǵa shaqyrdy.
«Bul oıyndar sportqa degen mahabbat, jańa bilim men aldaǵy eki aptanyń ishinde tabatyn jańa dostaryńyz jaıly bolmaq. Óıtkeni, jasóspirimder Olımpıadasy degenimiz de osy – bar álemnen jınalǵan jas sportshylardyń jyly ári dostyq atmosferada básekege túsýi. Dos bolyńyzdar, ózderińizdi jáne qarsylasty syılańyzdar, erejeni saqtańyzdar. Eń bastysy – Olımpıada oıyndaryna alǵash qatysqan sátterińizden erekshe lázzat alyńyzdar», - dedi Tomas Bah.
Álemdik básekege qatysý úshin 78 memleketten 14 pen 17 jas aralyǵyndaǵy 1800-den astam sportshy keldi.
Eske salaıyq, Olımpıadanyń bastalýyna arnalǵan resmı sharada Qazaqstannyń Memlekettik týyn qos sportshymyz – Krıstına Shýmekova men Erasyl Shyńǵyshan ustap shyqty.
Aıta keteıik, Ońtústik Koreıa mundaı iri kólemdegi jarysty osymen ekinshi ret uıymdastyryp otyr. Osyǵan deıin 2018 jyly Phenchhanda eresekter arasyndaǵy Qysqy Olımpıada oıyndaryn qabyldaǵan bolatyn.
Kanvon-2024 ashylý saltanatynyń mádenı qoıylymdary «Ǵalam» taqyrybynda órbidi. Bul – jastardyń sheksiz múmkindikterin dáripteıtin taqyryp.
Jas sportshylardyń keıpine engen qoıylym akterleri óz ǵarysh álemin zerttep, juldyzdaryn jaǵyp, jarqyraı tústi.
1 aqpanǵa deıin sozylatyn jarys baǵdarlamasynda jas sportshylar sporttyń 7 túrinen (15 dıstsıplına) 81 júlde jıyntyǵyn sarapqa salady. Qazaqstandyqtar bıatlon, shańǵy jarysy, konkımen júgirý, short-trek, shańǵymen tuǵyrdan sekirý, frıstaıldan paralleldi mogýl, taý shańǵysy sporty, kerlıng pen hokkeıden synǵa túsedi.
Alǵash bolyp jarysty 20 qańtar kúni bıatlonshylar (jekeleı syn), short-trekshiler (1500 metr), shańǵymen tuǵyrdan sekirý komandasy (jekeleı syn) jáne Polshaǵa qarsy irikteý matchyn ótkizetin hokkeıshiler bastaıdy.
