Erasyl Shyńǵyshan: Kanvonda kók týdy alyp shyǵý — men úshin zor mártebe
ASTANA. KAZINFORM — Sanaýly kúnderden soń Ońtústik Koreıanyń Kanvon qalasynda IV qysqy jasóspirimder Olımpıadasy bastalady. Búgin elordada sportshylardy shyǵaryp salý saltanatty sharasy ótti. Elimizdiń týyn 16 jasar oraldyq Erasyl Shyńǵyshan alyp shyǵady.
«Olımpıadaǵa sońǵy 2 aı boıy daıyndaldyq. Júlde alýǵa múmkindik mol. Týymyzdy kókke kóteremiz dep oılaımyn. Kók týdy alyp shyǵý - men úshin zor mártebe. Short-trek boıynsha negizgi qarsylastar - Ońtústik Koreıa, Qytaı, Kanada. Osy Olımpıadaǵa deıin 2023 jyly short-trekten Reseıde ótken halyqaralyq saıysqa qatysyp, ІІ oryn aldym. Kanvon qysqy Olımpıadasynda jeke jáne komandamen synǵa túsemiz», — dedi Erasyl Shyńǵyshan.
Jas sportshynyń aıtýynsha, ol short-trek sportymen sońǵy 7 jyl boıy aınalysyp keledi.
«Daıyndyq Astanada ótti. Barlyq jaǵdaı jasaldy. Kanvon qysqy Olımpıadasynyń ashylý saltanatynda týymyzdy alyp shyǵýyma bapkerim Tanabek Manarbekulynyń úlesi zor», — dedi ol.
Aıta ketsek, jasóspirimder Olımpıadasynda Qazaqstan týyn «Ulttar sherýi» kezinde Qazaqstan týyn konkımen júgirýden Petropavldan ulttyq quramanyń múshesi Krıstına Shýmekova men oraldyq short-trekshi Erasyl Shyńǵyshan alyp shyǵady.
