Kanvon-2024: Kerlıngten otandastarymyz qarsylastaryn birinshi ret iri eseppen utty

KANVON. KAZINFORM – Búgin Ońtústik Koreıanyń Kanvon qalasynda ótip jatqan jasóspirimder Olımpıadasynda kerlıngten aralas juptyq básekede jerlesterimiz birinshi ret qarsylastaryn iri eseppen utty.

Osy oraıda birden aıta keteıik, qazaqstandyq sportshylar kerlıngten qysqy jasóspirimder Olımpıadasynda birinshi ret óner kórsetip jatyr. Sondaı-aq, búgingi jeńisi — osy Olımpıada oıyndarynyń toptyq kezeńindegi alǵashqy iri jeńisi.

Búgin el namysyn qorǵaǵan Mereı Tastemir men Ibragım Tastemir juby Italııa quramasyn 10:2 esebimen qapy qaldyrdy.

Erteń Astana ýaqyty boıynsha 9:30-da quramamyz sheshýshi oıyndy Danııaǵa qarsy ótkizedi.
Esterińizge sala keteıik, osyǵan deıin qazaqstandyq kerlıng sheberleri Shveıtsarııaǵa 1:9 esebimen jol berse, Aýstrııa quramasynan 4:5 esebimen utyldy. Al germanııalyq qurdastaryna qarsy synda 4:8 esebimen ese jiberdi.

Aıta keteıik, Ońtústik Koreıadaǵy jasóspirimder Olımpıadasynda Qazaqstan namysyn sporttyń 5 túrinen 10 dıstsıplına boıynsha 41 sportshy qorǵap jatyr.

Kanvonda qysqy jasóspirimder Olımpıadasynyń alaýy 19 qańtar kúni tutanǵan bolatyn. Jarys 1 aqpanda máresine jetedi.