Kanvon-2024: Qazaqstandyqtar Olımpıadada qola jeńip alǵan hokkeıshilerdi kútip aldy

ASTANA. KAZINFORM – Astana qalasynyń halyqaralyq áýejaıynda elorda turǵyndary Ońtústik Koreıanyń Kanvon qalasynda ótip jatqan IV qysqy jasóspirimder Olımpıadasynda 3×3 hokkeıden alǵash ret qola júldege qol jetkizgen sportshylardy qarsy aldy.

«Jasóspirimder Olımpıadasynda alǵash ret baq synap, barlyq qarsylastarymyzben sońyna deıin aıqastyq. Alǵashqy Polshamen ótken kezdesýde iri jeńiske jetkenimizben, Aýstrııamen teńdeı oıynda 8:9 esebimen jeńildik. Birinshi jeńilis komandamyzǵa emotsııalyq turǵyda áser etti. Degenmen, qola júlde úshin oıynda qaıta jolyǵyp, esemizdi qaıtara aldyq. Qandaı qorytyndy shyǵarýǵa bolady? Salystyrmaly túrde biz Latvııadan keıin eń kóp 104 shaıba soqqan komanda atandyq. Áıtse de, kóptegen múmkindikterdi qoldana almadyq. Kemshiligimiz — qorǵanysymyzdyń turaqsyzdyǵy. Sebebi, 9 oıynda qaqpamyzǵa 83 shaıba ótkizip aldyq. Tipti chempıon atanǵan Latvııamen birinshi kezeńde utqanymyzben, keıin birneshe shaıba jiberdik. Jalpy, Olımpıadada Qazaqstan ulttyq quramasynyń tizimine enip, el namysyn qorǵaǵanymdy maqtan tutamyn!», - dep hokkeıshi Jahanger Tileýhan aǵynan jaryldy.

Esterińizge sala keteıik, Ońtústik Koreıadaǵy jasóspirimder Olımpıadasynda Qazaqstan namysyn sporttyń 5 túri men 10 dıstsıplına boıynsha 41 sportshy qorǵap jatyr.

Atap aıtar bolsaq, bıatlon, kerlıng, konkımen júgirý, short-trek, shaıbaly hokkeı, shańǵy jarysy, shańǵymen tuǵyrdan sekirý, shańǵy qossaıysy, taý shańǵysy, frıstaıldan paralleldi mogýl boıynsha baq synaýda.

Kanvon qysqy jasóspirimder Olımpıadasynyń alaýy 19 qańtar kúni tutanǵan bolatyn. Doda 1 aqpanda máresine jetedi. Atalǵan jarysqa álemniń 80-ge jýyq elinen 1 800-deı sportshy qatysýda. 7 sport túrinen (15 dıstsıplına) 81 medal jıyntyǵy sarapqa salynýda.