Kanvon-2024: qazaqstandyq sportshylar jasóspirimder olımpıadasyna attandy
ASTANA. KAZINFORM - Elordada otandyq sportshylardy Ońtústik Koreıada ótetin IV qysqy jasóspirimder olımpıadasyna shyǵaryp salý rásimi ótti.
«Qurmetti sportshylar, sizder barlyq kezeńderden súrinbeı ótip Ońtústik Koreıanyń Kanvon qalasynda ótetin IV qysqy jasóspirimder olımpıadasyna elimizdiń namysyn qorǵaýǵa attanǵaly tursyzdar. Álemdegi jetekshi sportshylardyń qataryna kire aldyńyzdar», - dedi Týrızm jáne sport mınıstri Ermek Marjyqpaev saltanatty sharada.
Mınıstrdiń málimetinshe, elimiz táýelsizdik alǵaly jasóspirimder olımpıadasynda 29 medal jeńip aldy, onyń 5-i qysqy olımpıadadan.
«Elimizde qysqy sporttardyń óz dástúri bar. Búginde tek elimizge ǵana emes, búkil álemge tanymal dańqty sportshylarymyz halyqaralyq qysqy jarystarda óner kórsetip, únemi júldegerler qatarynan kórinip keledi. Olardyń qatarynda shańǵyshy Vladımır Smırnov, konkımen júgirýshi Lıýdmıla Prokasheva, bıatlonshy Elena Hrýstaleva, mánerlep syrǵanaýshy Elızaveta Tursynbaeva bar. Sizder halyqaralyq sport dodasyna qatysa otyryp, zor tájirıbe jınaısyzdar», - dedi vedomstvo basshysy.
Esterińizge sala keteıik, IV qysqy jasóspirimder Olımpıadasy bıyl 19 qańtar men 1 aqpan aralyǵynda Ońtústik Koreıanyń Kanvon qalasynda ótedi.
Qazaqstannyń sport delegatsııasy quramynda sporttyń bes túrinen 42 sportshy bar.
Aıta ketsek, jasóspirimder Olımpıadasynda Qazaqstan týyn «Ulttar sherýi» kezinde Qazaqstan týyn konkımen júgirýden Petropavldan ulttyq quramanyń múshesi Krıstına Shýmekova men oraldyq short-trekshi Erasyl Shyńǵyshan alyp shyǵady.
Qazaqstan jasóspirimder arasyndaǵy qysqy Olımpıada oıyndaryna 2012 jyldan beri qatysyp keledi. Jalpy, elimiz úsh qysqy jasóspirimder Olımpıada oıyndaryna qatysyp, eki kúmis jáne alty qola medal jeńip aldy.
