Kanvon-2024: Bıatlonshylarymyzǵa bıyl júlde buıyra ma

Ońtústik Koreıanyń Kanvon qalasynda ótetin IV qysqy jasóspirimder Olımpıadasynda eń kóp júlde sarapqa salynatyn sport túrleriniń biri bıatlon, dep habarlaıdy Kazinform. 

Atalǵan Qysqy oıyndarda bıatlonnan el namysyn 6 sportshy qorǵaıdy.

Olar:

Alema Qarabaeva

Ilıas Hasenov

Evelına Mezentseva

Anton Redkın

Marııa Vorobeva

Kırıll Zotov

Kanvon Olımpıadasynda bıatlonnan 6 júlde jıyntyǵy sarapqa salynatyn bolady.

Esterińizge sala keteıik, osyǵan deıingi Olımpıada oıyndarynda bıatlonnan jasóspirimderimiz 1 kúmis, 2 qola medal jeńip alǵan bolatyn.

Atap aıtsaq, 2012 jylǵy Insbrýk (Aýstrııa) Olımpıadasynda Galına Vıshnevskaıa bir ózi 1 kúmis, 1 qola (bıatlon, sprınt baǵdarlamasy, 6 shaqyrym) – 17:55,2 jáne (bıatlon, iz kesý baǵdarlamasy, 7,5 shaqyrym) – 27:44,4 jeńip aldy.

Al 2016 jyly Lıllehammer (Norvegııa) Olımpıadasynda Arına Pantova (bıatlon, sprınt baǵdarlamasy, 6 shaqyrym) – 18:40,6 qola medalǵa qol jetkizdi.

Azııa qurlyǵy alǵash ret qabyldaıtyn jastar oıyndaryna Qazaqstan 10 baǵdarlamada 42 sportshy aparady. Al delegatsııa sapynda resmı ókilder, bapkerler, dárigerler men BAQ ókilderin qosqanda 80-nen astam adam bolady.

Barlyǵy báseke kezinde 79 memleketten jınalǵan 1900-ge jýyq atlet kúsh synasady dep josparlanǵan.