Qanttyń álemdegi baǵasy keıingi 15 aıdaǵy eń joǵary deńgeıge jetti
ASTANA. KAZINFORM — Álemde qanttyń bırjalyq baǵasy 18 tamyzdaǵy saýda-sattyqta 4% ósti.
ІSE derekteri boıynsha, saýda-sattyq barysynda qanttyń baǵasy bir fýnt úshin 17,58 tsent mejesinen asyp túsken. Bul — 2025 jyldyń 22 mamyrynan bergi eń joǵary kórsetkish.
Qant baǵasynyń ósýi birneshe faktorlarǵa baılanysty bolyp otyr.
Trading Economics jazǵandaı, Tynyq muhıtynyń ortalyq jáne shyǵys bóliginde sýdyń jylynýy (El-Nıno qubylysy) sońǵy birneshe onjyldyqtaǵy eń joǵary mejege jetip, qant óndirisine úlken qater tóndirip tur. Qant quraǵy men qant qyzylshasy egiletin alqaptardyń tarylyp kele jatqany sebepti sarapshylar da 2026-2027 jyldary álemde qant tapshylyǵy artatyny jaıly aıta bastady. Máselen, Úndistan, Eýropalyq Odaq jáne Taıland qolaısyz aýa-raıyna tótep bere almaıtyn eń osal aımaqtardyń qataryna jatady.
Sonymen qatar, munaı baǵasynyń joǵary bolýy Brazılııa sııaqty iri óndirýshi memleketti qanttyń ornyna etanol óndirýge, ıaǵnı qant quraǵyn sol maqsatqa jumsaýǵa kóbirek ıtermeleýi múmkin. Aıtalyq, shilde aıynyń sońynda bul el otyn qospasyndaǵy etanoldyń mindetti úlesin kóbeıtip jiberdi. Bul álemdik naryqtaǵy qant kóleminiń odan ári azaıýyna ákelýi múmkin.
Al qanttyń eń iri tutynýshysy Úndistan bolsa, ishki qoryn kóbeıtip, ári baǵanyń sharyqtaı ósýin tejeý úshin qazan aıynyń sońyna deıin osy ónimge ımporttyq baj salyǵyn tómendetýdi qarastyryp jatyr. Olaı eter bolsa, álemdik naryqtaǵy onsyz da az qant tipten tapshy bolyp ketýi múmkin.
Raıhan Rahmetova
