Qantty, mys shıkizatyn bajsyz ákelý: EEK keńesi otyrysynda mańyzdy sheshim qabyldandy
ASTANA. KAZINFORM - Máskeýde ótken Eýrazııalyq ekonomıkalyq komıssııa keńesi otyrysynda EAEO-ǵa múshe memleketterdiń ekonomıkasy úshin birqatar mańyzdy sheshim qabyldandy. Bul týraly Úkimettiń baspasóz qyzmeti habarlady.
Atap aıtqanda, Qazaqstanǵa 2026 jyldyń sońyna deıin 100 myń tonnaǵa deıingi kólemde shıki qant ımportyna kedendik ákelý bajyn nóldeý týraly sheshim qabyldandy. Bul shara qazaqstandyq qant zaýyttaryn shıkizatpen qamtamasyz etýge jáne ishki naryqta baǵasy qoljetimdi qant óndirýge baǵyttalǵan.
Qazirgi ýaqytta Qazaqstandaǵy qanttyń negizgi kólemi qamys shıkizatynan óndiriledi. Bul rette qant salasyn damytýdyń keshendi jospary sheńberinde qant qyzylshasyn qaıta óńdeý boıynsha jańa qýattardy qosqanda, óndiristi kezeń-kezeńimen ártaraptandyrý kózdelgen. Osy protsestiń uzaqtyǵyn eskere otyryp, qamys shıkizatyn ımporttaý salanyń turaqty jumysynyń qajetti sharty bolmaq.
Budan bólek, 2026 jyldyń sońyna deıin Qazaqstanǵa mys jáne mys tsementteý shteıni ımportynyń 2,5 myń tonnaǵa deıingi jıyntyq kólemi kedendik ákelý bajynan bosatylady. Sheshim shıkizat satyp alý shyǵynyn ońtaılandyrý men daıyn ónimniń básekege qabilettiligin arttyrý esebinen tústi metallýrgııa kásiporyndaryn qoldaý maqsatynda qabyldanǵan.
Qazaqstanda tsementteý mysyn «Kaztsınk» JShS óndiredi. Ol osy ónimniń ári óndirýshisi ári tutynýshysy. Kásiporynnyń mys jáne mys tsementteý shteınine jyldyq qajettiligi shamamen 1,8 myń tonna. Kedendik ákelý bajynyń mólsherlemesin nóldeý fıskaldyq júktemeni azaıtý, shyǵyndy azaıtý esebinen shıkizatty satyp alý kólemin ulǵaıtýǵa múmkindik beredi.
Qazaqstanǵa jáne EAEO-nyń basqa da elderine ákelinetin, toqyma materıaldaryn, bylǵaryny, júndi jáne hımııa ónerkásibiniń basqa da materıaldaryn óńdeýge arnalǵan birqatar taýarǵa kedendik ákelý bajyn úsh jyl merzimge nóldeý týraly sheshim qabyldandy.
Sonymen qatar EEK Keńesinde 2026 jylǵy 15 mamyrǵa deıin Qazaqstanǵa shıe (500 tonna), órik (3 myń tonna), shıe (1,5 myń tonna), qara órik (1,5 myń tonna) ákelýdi kedendik bajdan bosatý kelisildi.
EEK Keńesiniń otyrysyna qatysýshylar AÓK salasyndaǵy birlesken kooperatsııalyq jobalarǵa qarjylyq qoldaý kórsetýge ýaǵdalasty. Mundaı múmkindikke EAEO quqyǵyna qajetti túzetý engizilgennen keıin EAEO-ǵa qatysýshy elderdiń aýyl sharýashylyǵy kásiporyndary qol jetkize alady.
Aıta keteıik, bıyl Qazaqstan Eýrazııalyq ekonomıkalyq odaqqa tóraǵalyq etip jatyr. Máskeýde ótken Eýrazııalyq ekonomıkalyq komıssııa keńesiniń bıylǵy alǵashqy otyrysyn asha otyryp, Serik Jumanǵarın Keńes músheleri men baıqaýshy elderdiń ókilderine arnap sóz sóılep, Qazaqstan tóraǵalyǵynyń negizgi basymdyqtaryn atap ótti.