Qantty 3,6 ese, tuzdy 5 ese azaıtady: mektepte tamaqtanýdyń jańa standarty ázirlendi

ASTANA. KAZINFORM – Bıyl 1 qyrkúıekten bastap mektepterde durys tamaqtaný boıynsha halyqaralyq usynymdarǵa sáıkes ázirlengen tamaqtanýdyń jańa standarty jáne perspektıvalyq mázir qoldanysqa engiziledi. Tolyǵyraq Densaýlyq saqtaý mınıstri Aqmaral Álnazarova aıtyp berdi.

- Mańǵystaý oblysyndaǵy tamaqtan ýlaný oqıǵalary erekshe alańdaýshylyq týdyrdy. Bul tásilderdi reformalaý qajettiligin kórsetip otyr. Balalar bolatyn obektilerdegi qaýipsizdik deńgeıin arttyrý maqsatynda bizdiń mınıstrlik memlekettik bıýdjetten qarjylanatyn balalar obektilerin memlekettik baqylaýdy kúsheıtý jónindegi jańa tásilderdi ázirledi, - dedi Aqmaral Álnazarova Úkimet otyrysynda. 

Engiziletin negizgi túzetýler:

• balalar bolatyn obektiler úshin erekshe mártebe berý;
• obektidegi aǵymdaǵy jaǵdaıdy durys baǵalaý úshin aldaǵy tekserýler týraly aldyn ala habarlamany alyp tastaý;
• obektilerdi sanıtarııalyq-epıdemıologııalyq talaptarǵa sáıkes keltirý maqsatynda monıtorıngtik saparlar júıesin engizý.

- Bıyl 1 qyrkúıekten bastap bilim berý uıymdarynda durys tamaqtaný boıynsha halyqaralyq usynymdarǵa sáıkes ázirlengen tamaqtanýdyń jańa standarty jáne kóp nusqaly úlgilik perspektıvalyq mázir qoldanysqa engiziledi. Tamaqtanýdyń jańa standarty durys tamaqtanýǵa baǵyttalǵan, atap aıtqanda semizdik, qant dıabeti, júrek-qan tamyrlary jáne basqa aýrýlardyń damý qaýpin azaıtý maqsatynda qantty 3,6 ese tuzdy 5 ese deıin azaıtýdy kózdeıdi. Bul norma ınfektsııalyq emes aýrýlardy, atap aıtqanda, balalardaǵy semizdikti 15%-ǵa deıin, qant dıabetin 20%-ǵa deıin, arterııalyq gıpertenzııany 18%-ǵa deıin jáne basqa da sozylmaly aýrýlardy 15%-ǵa deıin azaıtýǵa yqpal etedi, - deıdi vedomstvo basshysy. 

Mınıstrdiń aıtýynsha, tamaqtaný standartynda as bloktary joq shaǵyn jınaqtalǵan mektepter úshin mázir kózdelgen, alǵash ret mektep taǵamdaryna qanaǵattaný deńgeıin baǵalaýǵa múmkindik beretin jeýge jaramsyzdyq ındeksi (tárelkedegi tamaq qaldyqtary) uǵymy engizildi.

- Tamaqtanýdyń jańa standarty bilim berý obektileri men mektepke deıingi balalar obektilerine qoldanylady. Tamaqtaný standartyn engizý maqsatynda qazirgi ýaqytta Bilim jáne densaýlyq saqtaý basqarmalarynyń, mektep ákimshilikteri men tamaq ónim berýshileriniń qatysýymen oqytý semınarlary ótkizilip jatyr,- dep tolyqtyrdy A. Álnazarova. 

Buǵan deıin mınıstr mektep ashanalarynda jıi buzylatyn zań buzýshylyqtardy atady.