Qańtarylǵan júk kólikterine qatysty daý: kólik ıesi 10 táýlikke qamaldy
PETROPAVL. KAZINFORM - Petropavlda polıtsııanyń talabyna baǵynbaǵan júk kólikteri ıesiniń isi sotta qaralyp, ákimshilik jaza kesildi.
Іsti Petropavl qalasynyń mamandandyrylǵan ákimshilik quqyq buzýshylyqtar jónindegi soty qarady.
Sottyń málimetinshe, birneshe júk kóligi uzaq ýaqyt boıy «Astana-Kókshetaý» respýblıkalyq mańyzy bar avtojolynyń 479-480-shaqyrymynda, Petropavl mańynda turǵan. Sonyń saldarynan jol jabynyna zaqym kelip, shókken.
Polıtsııa qyzmetkerleri kólik ıesine júk kólikterin jol jıeginen alyp tastaý týraly zańdy talap qoıǵan. Alaıda ol bul talapty oryndamaǵan.
Sot otyrysynda quqyq buzýshy avtokólikterdi alyp ketýge kiltterdiń bolmaýy, júrgizýshilermen baılanys úzilgeni jáne tehnıkalyq aqaýlar kedergi bolǵanyn aıtty. Degenmen ol sotqa muny naqty dáleldermen rastaı almaǵan.
Sottyń pikirinshe, kólik quralynyń menshik ıesi onyń saqtalýyn qamtamasyz etýge, sondaı-aq jol qozǵalysyna kedergi keltiretin jaǵdaılardy der kezinde joıýǵa, onyń ishinde tehnıkalyq aqaýy bar kólikti jóndeý nemese evakýatsııalaý boıynsha shara qabyldaýǵa mindetti.
Jaza taǵaıyndaý kezinde sot quqyq buzýshylyqtyń sıpatyn, istiń mán-jaıyn jáne azamattyń buǵan deıin de aýyr salmaqty júk kólikterin paıdalanýǵa baılanysty ákimshilik jaýapkershilikke birneshe ret tartylǵanyn eskerdi.
Sot qaýlysymen er adam Qazaqstan Respýblıkasy Ákimshilik quqyq buzýshylyq týraly kodeksiniń 667-babynyń 1-bóligi boıynsha kináli dep tanylyp, 10 táýlikke ákimshilik qamaqqa alyndy.
Qaýly ázirge zańdy kúshine engen joq.
Buǵan deıin Petropavlǵa kire beriste úsh kún boıy 30 shaqty júk kóligi qańtarylyp turǵanyn jazǵan edik.
