Qańtardyń 1-inen bastap Qazaqstanda alǵash ret qamaý túrindegi jaza engiziledi
ASTANA. Jeltoqsannyń 21-i. QazAqparat /Ǵalymjan Hasenov/ - Aǵymdaǵy jyly jeltoqsan aıynyń basynda qol qoıylǵan «Qazaqstan Respýblıkasynyń keıbir zańnamalyq aktilerine qylmystyq jazalaýdy oryndaý júıesin jáne qylmystyq-atqarý júıesin odan ári jetildirý máseleleri jónindegi ózgertýler men tolyqtyrýlar engizý týraly» QR Zańyna sáıkes 2010 jyly qańtardyń 1-inen bastap Qazaqstanda alǵash ret qamaý túrinde jaza engiziledi.
Bul týraly Ádilet mınıstrligi Qylmystyq-atqarý júıesi komıtetiniń baspasóz qyzmetinen habarlady.
Komıtet tóraǵasy Meıram Aıýbaevtyń, Bas prokýratýra men Іshki ister mınıstrligi ókilderiniń jáne komıtettiń oblystyq apparattary basshylarynyń qatysýymen ótken keńeıtilgen respýblıkalyq selektorlyq keńeste osy taqyrypqa basa nazar aýdaryldy.
Atalmysh zań jalpy qylmystyq 199 quram jáne 20 áskerı qylmys boıynsha sanktsııalarǵa qamaý túrindegi jaza engizýdi qarastyrady. Esterińizge sala keteıik, QR Qylmystyq kodeksiniń 46-shy babynyń negizinde, qamaý túrindegi jaza sot taǵaıyndaǵan jazanyń barlyq merzimine (1 aıdan 6 aıǵa deıin) qoǵamnan qatań oqshaýlaý jaǵdaıynda osy jaza túrine sottalǵan tulǵaǵa qoldanylady. Jazalaýdyń bul túni penıtentsıarlyq júıeniń tergeý abaqtylarynda júzege asyrylatyn bolady. Degenmen, olar qamaýda otyrǵan basqa sanattaǵy tulǵalardan bólek ustalady. Atap aıtqanda, erler men áıelder bólek otyrǵyzylady, sondaı-aq túzetý oryndarynda buryn bolǵan tulǵalar bólek ustalady.
Keńeste atap kórsetilgendeı, tergeý abaqtylarynda qamaý túrindegi jazalaýdy oryndaý úshin jeke ýchaskeler ázirlenip, ol jaılarda jóndeý jáne qaıta jańartý jumystary júrgizildi, basqa da uıymdastyrýshylyq máseleler sheshildi, sondaı-aq Qamaý túrindegi jazalaýdy oryndaýdyń erejesi jasaldy.
Bul zań sottalǵan adamdardy qoǵamnan oqshaýlaýǵa baılanysty emes, qylmystyq quqyqtyq yqpal etý sharalarynyń tıimdiligin kúsheıtý, sondaı-aq qylmystyq atqarý júıesi mekemeleri qyzmetkerleriniń quqyqtyq jáne áleýmettik qorǵalýyn arttyrý maqsatynda ázirlengen.
