Qańtardyń alǵashqy 10 kúninde 4 adamdy poıyz qaǵyp ketip, ekeýi kóz jumǵan

Bıyl qańtardyń alǵashqy on kúninde 4 adam jyljymaly quramnyń astyna túsken. Onyń ishinde 2 adamnyń mert bolǵany anyqtalyp otyr, dep habarlaıdy Kazinform.

Kóliktegi polıtsııa departamenti baspasóz qyzmetiniń málimetine súıensek, 8 qańtarda «Kóliktegi qaýipsizdik» aktsııasy bastalǵan. Aktsııanyń maqsaty – kólik nysandarynda qaýipsizdikti qamtamasyz etý, qoǵamdyq oryndarda jasalatyn qylmystar men jazataıym oqıǵalardyń aldyn alý.

«Qańtardyń alǵashqy on kúninde temirjol tósemin belgilenbegen jerden kesip ótkeni úshin 1024 adam ákimshilik jaýapkershilikke tartyldy. Al, 4 adamnyń 4 adam jyljymaly quramnyń astyna túsý deregi tirkeldi. Onyń ishinde 2 adam mert boldy. Máselen, Aqmola oblysynyń «Qara-Adyr» stantsııasynda júk poıyzynyń mashınısi temirjolda bógde adamnyń bolýyna baılanysty shuǵyl tejeýdi qoldandy. Tekserý kezinde Aqmola oblysynyń 69 jastaǵy turǵynynyń belgilenbegen jerden temirjoldy kesip ótkeni anyqtaldy», -dep habarlady departamenttiń baspasóz qyzmeti.

Quqyq buzýshy QR Ákimshilik quqyq buzýshylyq týraly kodeksiniń 559-babynyń 5-bóligimen ákimshilik jaýapkershilikke tartylǵan.

«Temirjol kóligi nysandaryndaǵy qaýipsizdik erejelerine sáıkes belgilenbegen jerden temirjoldy kesip ótýge tyıym salynǵanyn eskertemiz. Temirjoldan ótý úshin arnaıy jabdyqtalǵan jaıaý júrginshiler ótkelderin (týnnelder, kópirler) paıdalaný qajet», -dep málim etti departamenttiń baspasóz qyzmetinen.

Eske sala ketelik, buǵan deıin Atyraý oblysynda jolaýshylar poıyzy bes túıeni basyp ketkenin jazǵan edik.