Qańtardan beri sabaqqa qatyspaǵan jasóspirim Almatydaǵy arnaıy mektepke jiberildi
ATYRAÝ. KAZINFORM – Atyraýda 15 jastaǵy oqýshy qańtar aıynan beri birneshe sabaqqa sebepsiz barmaǵan. Jasóspirimniń zańdy ókili birneshe ret ákimshilik jaýapqa tartylǵan.
Atyraý oblystyq Polıtsııa departamenti baspasóz qyzmeti devıantty minez-qulyq kórsetken jasóspirimge qatysty sot sheshimi shyqqanyn habarlady.
– Atyraý oblystyq kámeletke tolmaǵandardyń isteri jónindegi mamandandyrylǵan aýdanaralyq sotynda 2010 jylǵy jasóspirimdi devıantty minez-qulyqty balalarǵa arnalǵan mektepke ornalastyrý týraly azamattyq is qaraldy. Atalǵan jasóspirim 2025 jyldyń qańtar aıynan beri sebepsiz birneshe ret sabaqqa barmaǵan. Onyń zańdy ókili QR Ákimshilik quqyq buzýshylyq týraly kodeksiniń 127-baby jáne 442-baby boıynsha birneshe márte ákimshilik jaýapkershilikke tartyldy, - dep málim etti departamenttiń baspasóz qyzmeti.
Alaıda jasóspirimge qatysty júrgizilgen profılaktıkalyq jumys oń nátıje bermegen. Sol sebepten Atyraý qalalyq ákimdigi janyndaǵy kámeletke tolmaǵandardyń isteri jáne olardyń quqyqtaryn qorǵaý jónindegi komıssııanyń qaraýyna usynys joldanǵan.
– Komıssııa jasóspirimdi devıantty minez-qulyqty balalarǵa arnalǵan arnaýly bilim berý uıymyna ornalastyrý týraly sheshim qabyldady. Sot ishki ister organynyń talap aryzy qanaǵattandyryp, kámeletke tolmaǵan jasóspirimdi 6 aı merzimge Almaty qalasyndaǵy devıantty minez-qulyqty balalarǵa arnalǵan arnaýly bilim berý uıymyna ornalastyrý týraly sheshim shyǵardy, -dep habarlady departamenttiń baspasóz qyzmeti.
Eske sala ketelik, budan buryn Atyraýda bet-álpetti tanıtyn kameramen halyqaralyq izdeýde júrgen 2 adam anyqtalǵanyn habarlaǵan edik.