Qańtardan beri atyraýlyq tutynýshylardyń 5,7 mln teńgesi keri qaıtarylǵan

ATYRAÝ. KAZINFORM – Bıyl qańtardan beri atyraýlyq tutynýshylardan 193 shaǵym túsken. Onyń ishinde 113 shaǵymnyń ıesine 5,7 mln teńgesi keri qaıtarylyp otyr. 

Atyraý oblysy boıynsha saýda jáne tutynýshylardyń quqyqtaryn qorǵaý departamentiniń basshysy Álem Ýálıevtiń aıtýynsha, 28 shaǵymdanýshyǵa túsindirý jumysy júrgizilgen.

«Ár shaǵymnyń mańyzy, ondaǵy kóterilgen másele egjeı-tegjeıli zerdelenedi. Osy turǵydan aıtqanda, keıbir shaǵymdaǵy máseleler boıynsha túsindirý jumysyn júrgizýge týra keldi. Shaǵym berýshilerdiń arasynan 113 tutynýshynyń talaby qanaǵattandyrylyp, olarǵa 5 mln 757 myń 474 teńgesi keri qaıtaryldy. Al, 32 shaǵymda aıtylǵan jaıttardy qaraý bizdiń departamenttiń quziretine jatpaıtynyn anyqtaldy», - dedi Álem Ýálıev.

Onyń deregine júginsek, qazir 20 shaǵym áli qaralyp jatyr. Sondaı-aq, 35 tutynýshyǵa telefon jelisi arqyly konsýltatıvtik keńes berilgen.

Departament basshysynyń orynbasary Erkebulan Taǵashovtyń málimetinshe, tutynýshylardyń saýda salasyna qatysty quqyǵyna basa mán berilip otyr.

«Oblys ákiminiń ókimine sáıkes «Atyraý oblysy boıynsha azyq-túlik taýarlaryna baǵa belgileýdiń búkil tizbegi, deldaldyq shemalardy tekserý jónindegi» komıssııasy qurylǵan edi. Osy kezge deıin 8 ret jıyn ótkizgen komıssııa músheleri áleýmettik mańyzy bar azyq-túlik taýarlarynyń baǵasyn 15 paıyzdyq ústemeden asyryp satý, josyqsyz deldaldarǵa qatysty 25 derekti anyqtady. Saýda qyzmetin retteý týraly zań talaptaryn buzǵan 25 kásipkerlik sýbektige tıisti shara qoldanyldy», - dep málim etti Erkebulan Taǵashov.

Eske sala ketelik, budan buryn Atyraý oblysynda qańtardan beri 2599 áıel jumysqa ornalasqanyn jazǵan bolatynbyz.