Qańtardan bastap sheteldikter úshin Reseıge kirý erejesi qatańdaıdy
ASTANA. KAZINFORM — 2025 jyldyń 1 qańtarynan bastap Reseıge kiretin sheteldik azamattardyń ýaqytsha bolý merzimi týraly zańnamalyq ózgerister kúshine endi. Reseı Federatsııasyna taban tiregen sheteldikterdiń sonda bolý merzimi 90 táýlikke qysqardy, dep habarlaıdy Qazaqstannyń Reseıdegi Elshiligi.
Buryn elge vızasyz kirgen sheteldikter Reseıde 180 kún ishinde 90 kúnnen aspaýy kerek edi. Elshilik Reseı Federatsııasynyń aýmaǵynda jylyna 90 táýlikten astam oqýǵa, jumys isteýge, ýaqytsha turýǵa nemese baspana alýǵa kelgen azamattarǵa ruqsat etilgenin túsindiredi.
Ózgerister Reseı Federatsııasyna vızasyz kelgen sheteldik azamattarǵa qoldanylady. Reseıge vızamen kelgen sheteldiktiń ýaqytsha bolý merzimi, burynǵydaı, ózgerissiz qalyp otyr.
Sondaı-aq, «Interfaks» habarlaǵandaı, Reseı prezıdenti Vladımır Pýtın zańsyz mıgranttardy 2025 jyldyń 30 sáýirine deıin Reseıden ketýge mindetteıtin Jarlyqqa qol qoıdy.
Qalǵysy keletin mıgranttar zańdastyrylýy kerek: kóshi-qon qyzmetinde tirkelý, bıometrııalyq jáne medıtsınalyq málimetterdi, orys tilin biletindigin, Reseı tarıhy men Reseı Federatsııasynyń zańnamasynyń negizderin biletindigin rastaıtyn qujattardy usyný, sonymen qatar turýǵa jáne jumys isteýge ruqsat berý.
Reseı Federatsııasynyń Qorǵanys mınıstrligimen kelisimshartqa otyrǵan sheteldikterge erekshe jaǵdaı jasalmaq.
Buǵan deıin habarlanǵandaı, kerisinshe Ázerbaıjan Reseı azamattarynyń elge kirý erejelerin qatańdatpaq.