Qańtardan bastap elde qyzanaq, jylqy eti, qara shaı baǵasyn qadaǵalaý engiziledi

ASTANA. KAZINFORM — Saýda jáne ıntegratsııa mınıstri Arman Shaqqalıev áleýmettik mańyzy bar azyq-túlik taýarlarynyń tizbesin keńeıtýge qatysty túsinik berdi. 

— Bul ýaqytsha shara ekeni kelisildi. Qazir áleýmettik mańyzy bar azyq-túlik taýarlarynyń tiziminde 19 ónim bolsa, ony 33 ataýǵa deıin keńeıttik, ıaǵnı onyń arasynda qyzanaq pen qııar da qamtyldy… Tıisti buıryqqa búgin qol qoıamyn, kelesi jyldyń 6 qańtarynan bastap kúshine enedi, — dedi Arman Shaqqalıev Májilistiń jalpy otyrysynan keıin tilshiler suraǵyna jaýap bere otyryp.

Osy oraıda ol bul sheshim aıasynda keńeıtilgen tizimge qatysty is-sharalar bir toqsan boıy júzege asyrylatynyn aıtty.

— Eger baǵa boıynsha dınamıka saqtalsa, bul buıryq taǵy da uzartylýy múmkin. Bul rette 15 paıyzdyq ústeme boıynsha shekteý eskeriledi, — dedi mınıstr.

Eske salsaq, jeltoqsan aıynyń basynda Saýda mınıstrligi áleýmettik mańyzy bar azyq-túlik taýarlary tizbesin keńeıtý týraly buıryq jobasyn qoǵamdyq talqylaýǵa shyǵardy. 

Buǵan deıin tizbede 19 ataý bolsa, jańa jobada olardyń sanyn 33-ke deıin arttyrý usynyldy. Buıryq jobasyna sáıkes jańartylǵan tizbege qyzanaq, qııar, alma, sıyr eti súıegimen, súıeksiz sıyr eti, tartylǵan et, qoı eti súıegimen, jańa nemese salqyndatylǵan balyq, muzdatylǵan balyq, ýltrapasterlengen sút, qaımaq, qatty irimshik, qara shaıdy qosý kózdelgen.

Osyǵan deıin saýda ústemesin asyryp qosqan kásipkerler jaýapkershilikke tartylǵanyn jazǵan edik.