Qańtardan bastap 34 jańa jalpy dárigerlik aımaq ashylady - Qyzylorda oblysy
QYZYLORDA. QazAqparat-Qyzylorda oblysynda alǵashqy medıtsınalyq-sanıtarlyq kómek kórsetý jelisi 379 adamǵa tolyqty. Jyl basynda medıtsına mamandarymen qamtylý 87 paıyzdy (328) quraǵan.
Esepti merzimge deıin alǵashqy medıtsınalyq-saraptamalyq kómek kórsetý jelisine 32 jas maman tartylyp, qyzmetkerler sany 95 paıyzǵa ulǵaıtyldy. Bul týraly Qyzylorda oblysynyń densaýlyq saqtaý basqarmasynyń basshysy Aqmaral Álnazarova málim etti,-dep habarlady QazAqparat HAA tilshisi.
- Alǵashqy medıtsınalyq-sanıtarlyq kómek kórsetý dárigerleri men medbıkelerdiń sany 1:3 sáıkestigine keltirildi. Sonymen birge dárigerlik aımaqtarda tirkelgen halyq sanyn 2200-den 1800-ge deıin, al 2019 jylǵa qaraı 1500-ge deıin azaıtý josparlanýda. 2017 jyldyń qańtar aıynan bastap alǵashqy medıtsınalyq-sanıtarlyq kómek kórsetý sapasyn arttyrý maqsatynda 34 jańa jalpy dárigerlik aımaq ashylatyn bolady,- dedi basqarma basshysy Aqmaral Álnazarova.
Oblystaǵy barlyq medıtsınalyq mekemelerde emdelýshilerdi qoldaý qyzmeti qurylǵan. Kezekke turýdy azaıtý jáne qyzmet kórsetý sapasyn arttyrý maqsatynda alǵashqy medıtsınalyq-sanıtarlyq kómek kórsetý uıymdarynyń tirkeý jumystary iske qosyldy. Júıe ákimshiligi qyzmeti engizildi, iri emhanalarda emdelýshilerdiń rettiligin baqylaý úshin arnaıy beınekameralar ornatyldy.
