Qańtardan balalarǵa beriletin memlekettik járdemaqylardyń kólemi artady

ASTANA. KAZINFORM – Jalpy, 2025 jylǵa arnalǵan respýblıkalyq bıýdjette balalary bar otbasylarǵa járdemaqy tóleýge 875 mlrd teńge qarastyrylǵan. Bul týraly Úkimette ótip jatqan brıfıngte Premer-Mınıstrdiń orynbasary – Ulttyq ekonomıka mınıstri Nurlan Baıbazarov aıtty.

— Balalary bar 2 mln-ǵa jýyq qazaqstandyq otbasy respýblıkalyq bıýdjetten járdema jáne Memlekettik áleýmettik saqtandyrý qorynan áleýmettik tólemdermen qamtylady. 2025 jyldan bastap balalary bar otbasylarǵa beriletin memlekettik járdemaqylardyń barlyq mólsheri 6,5 paıyzǵa ındeksteledi. Jalpy, 2025 jylǵa arnalǵan respýblıkalyq bıýdjette balalary bar otbasylarǵa járdemaqy tóleýge 875 mlrd teńge qarastyrylǵan, — dedi Nurlan Baıbazarov. 

Onyń atap ótýinshe, az qamtylǵan azamattardy áleýmettik qoldaý ataýly áleýmettik qoldaý arqyly jalǵasady. Osy jyldyń 1 qarashasynda ataýly áleýmettik kómekti 76 myń otbasy nemese 403 myń adam aldy. 

— Ataýly áleýmettik kómek kórsetý tásilderin qaıta qaraý aıasynda azamattardyń shyǵystaryn eskere otyryp, Otbasynyń tsıfrlyq kartasyn paıdalaný arqyly ataýly áleýmettik kómektiń transformatsııasy, sonymen qatar memlekettik jáne memlekettik emes uıymdardyń júıelerimen biriktirý kútilip otyr, — dedi ol.