Qańtardaǵy jappaı ereýilge qatysy bar 514 kúdikti qamaýda otyr

NUR-SULTAN. QazAqparat – Qańtar oqıǵasyna qatysty 514 kúdikti adam qamaýda otyr. Bul týraly QR Bas prokýratýrasy 1-qyzmet bastyǵynyń orynbasary Eldos Qılymjanov aıtty, dep habarlaıdy QazAqparat tilshisi.

«Jalpy qańtar oqıǵasy boıynsha sotqa 392 qylmystyq is joldanyp, ol boıynsha 445 adam sottaldy. Bılik ókilderine qarsy kúsh qoldanyp, múlikterdi joıýǵa baılanysty aýyr qylmysty jasaǵan, zalaldy ótemegen jáne ótelmegen sottylyǵy bar 46 sottalýshy bas bostandyǵynan aıyrýdyń naqty merzimine sottaldy. Qazirgi ýaqytta 514 kúdikti qamaýda», - dedi ol Ortalyq kommýnıkatsııalar qyzmetindegi brıfıng barysynda.

Onyń aıtýynsha, atalǵan adamdar qıratýǵa, ǵımarattardy órteýge, atys qarýlaryn jymqyrýǵa, memlekettik obektilerge jáne qurylymdyq kúsh qyzmetkerlerine shabýylǵa belsendi túrde qatysqan.

Árbir qamaýǵa alynǵan adamnyń qylmysqa qatysy bar-joǵy jóninde jetkilikti málimetter bar.

Olardyń bárine qorǵalý quqyǵy, sanıtarlyq normalar, tamaqtaný, dári-dármek jáne ustaýdyń tıisti jaǵdaılary qamtamasyz etilgen.

«Jeke basyn, densaýlyq jaǵdaıyn jáne basqa da mán-jaıdy eskere otyryp, 284 adamnyń qamaýda ustaý sharasy eshqaıda ketpeý týraly qolhatqa, kepilge, úıqamaqqa jáne jeke kepilgerlikke aýystyryldy», - dedi Bas prokýratýra ókili.