Qańtardaǵy UBT-da eń joǵarǵy ball 135 boldy

NUR-SULTAN. QazAqparat - Talapkerlerdiń 70%-ǵa jýyǵy qańtar aıyndaǵy UBT-da shekti ball jınady. Bul byltyrmen salystyrǵanda 20%-ǵa joǵary. Al ortasha balǵa keletin bolsaq, bul kórsetkish 7%-ǵa artyp, shamamen 68 baldy qurady. Eń joǵary ball 135 boldy, dep habarlaıdy QazAqparat.

Mınıstrliktiń málimetinshe, qańtardaǵy ulttyq biryńǵaı testileýge barlyǵy 102 myńǵa jýyq adam qatysty.

Onyń ishinde túlekterdiń 78,3%-y qazaq tilinde, 21,5%-y orys tilinde, 0,16%-y aǵylshyn tilinde testileýden ótti.

Qańtar aıyndaǵy UBT-ǵa erekshe bilim berýdi qajet etetin 99 bala qatysty.

Byltyr osy kezeńde kórý, estý, tirek-qımyl apparaty buzylǵan 33 talapker test tapsyrǵan bolatyn.

Aıta ketetini, bıyl alǵash ret erekshe qajettigi bar túlekterge testileý tapsyrmalaryn oryndaý úshin negizgi 240 mınýttan bólek, taǵy qosymsha 40 mınýt ýaqyt berildi.

Sonymen qatar osy túlekter úshin syzbalarsyz, dıagrammalarsyz jáne shemalarsyz test nusqalary arnaıy ázirlendi.

«Qańtardaǵy UBT bıylǵy 25 qańtar men 22 aqpan aralyǵynda 42 óńirlik testileý ortalyǵynda ótti. Testileý osymen ekinshi jyl qatarynan elektrondy formatta júrgizilip keledi. Testileý kezinde talapkerler suraqtarǵa qaıta orala alady jáne qaǵaz blank toltyrýǵa ýaqyt jumsamaıdy. Osylaısha, UBT nátıjeleri jaqsaryp, ortasha ball aıtarlyqtaı ósti. Sondaı-aq elektrondy format testileýdiń ashyqtyǵyn qamtamasyz etýge múmkindik berdi. Ornatylǵan kameralardyń arqasynda testileý kezinde ereje buzý faktileri de aıtarlyqtaı azaıdy. Túlekterdiń basym bóligi ózine jáne óz bilimine senetini qýantady», – deıdi Ulttyq testileý ortalyǵynyń dırektory Rýslan Emelbaev.