Qańtardaǵy tártipsizdikterdi telegram kanal arqyly uıymdastyrǵan kúdikti ustaldy

NUR-SULTAN. QazAqparat – Qańtar oqıǵasy kezinde Telegram kanaly arqyly quqyq qorǵaý qyzmetkerlerine qarsylyq bildirý úshin tolyq nusqaýlyqtar taratylǵan. Bul týraly Ortalyq kommýnıkatsııalar qyzmetinde QR Bas prokýratýrasy 1-qyzmet bastyǵynyń orynbasary Eldos Qılymjanov aıtty, dep habarlaıdy QazAqparat tilshisi.

«Jambyl oblysynyń turǵyny 2022 jylǵy 4 qańtarda Almaty qalasynda bolyp, Telegramm kanaldy ashyp, oǵan sanaýly saǵattarda birneshe myń qatysýshy jazyldy. Osy kanal arqyly onyń qatysýshylary barrıkadalardy qurý, «Molotov» kokteılderin daıyndaý jáne quqyq qorǵaý qyzmetkerlerine qarsylyq bildirý úshin tolyq nusqaýlyq alyp otyrǵan. Keıin bıylǵy 5-6 qańtarda atalǵan kanal arqyly qıratýshylardyń qozǵalysy jáne olardyń Jambyl oblysynyń memlekettik obektilerine jasaǵan shabýyldaryn barysy týraly aqparat júrdi», - dedi E. Qılymjanov.

Onyń aıtýynsha, kúdikti adam anyqtalyp, qamaýǵa alyndy.

«Osy óńirde «Gazel» avtokóliginiń júrgizýshisi «S» jáne onyń jaqtasy «K» esimdi azamattar anyqtaldy. Olar atalǵan kólikpen júrip, aldyn ala daıyndalǵan armatýrany, urlanǵan polıtsııanyń qalqandary men bronjıletterin taratqan. Sondaı-aq, quqyq qorǵaý qyzmetkerleriniń júrýin qıyndatý úshin, olar avtokólikti joldardy jabýda qoldanǵan.

Qylmystyq isterdi taldaý nátıjeleri osy qylmystardy jasaýdyń uqsas tásilderi qaıǵyly oqıǵalar bolǵan basqa óńirlerde de baıqalatynyn kórsetti. Bul mán-jaılar olardyń úılestirilýin jáne biryńǵaı jospardyń bolǵandyǵyn baıqatty», - dedi Bas prokýratýranyń ókili.

Budan buryn habarlanǵandaı, qańtar oqıǵasyna qatysty sot sanktsııalarymen 627 kúdikti adam qamaýda otyr.