Qańtardaǵy azaptaýlar týraly shaǵymdar boıynsha 329 qylmystyq is qozǵaldy

ASTANA. QazAqparat – Qańtarda azaptaý tásilderin qoldanǵan qyzmetkerler shenine qaramastan tıisti jazasyn alady. Bul týraly Parlament Májilisiniń jalpy otyrysynda QR Bas prokýrory Berik Asylov málim etti, dep habarlaıdy QazAqparat tilshisi.

«Ókinishke qaraı, haos kezinde kúshtik organdardyń birqatar qyzmetkeri ustalǵandarǵa qatygezdik tanytty. Bul jaǵdaıdy esh nársemen aqtaýǵa bolmaıdy. Prezıdent tapsyrǵandaı, azaptaý qoldanǵan qyzmetkerler shenine qaramastan, tıisti jazasyn alady», - dedi B.Asylov.

Onyń aıtýynsha, azaptaýlar týraly shaǵymdar boıynsha barlyǵy 329 qylmystyq is qozǵaldy.

«Olardyń basym bóligi Sybaılas jemqorlyqqa qarsy is-qımyl qyzmetiniń qaraýynda boldy. Arnaıy prokýrorlar polıtsııa men Ulttyq qaýipsizdik komıtetiniń 34 qyzmetkerine qatysty isti tergedi. Almaty oblysynyń polıtsııa ǵımaratynda 24 adamdy azaptaý faktileri týraly ister sotqa joldandy. Sondaı-aq Almaty qalasynyń Ýaqytsha ustaý ızolıatorynda jáne Bostandyq aýdanynyń polıtsııa bóliminde 3 adamdy azaptaý faktisi boıynsha ister de sotqa joldandy», - dedi Bas prokýror.

Onyń aıtýynsha, azaptaý saldarynan Taldyqorǵanda Muqashevtyń, Almatyda Ótepbaevtyń, Semeıde Jotabaevtyń qaıtys bolý faktileri boıynsha tergeý aıaqtaldy. Materıaldar boıynsha tanystyrý júrgennen keıin, qujat sotqa joldanady.