Qańtardaǵy azaptaý týraly 432 istiń 56-sy ǵana dáleldendi

ASTANA. QazAqparat – Qańtar oqıǵasynda kúshtik qurylymdardyń kúdiktilerdi azaptaýy boıynsha 432 is tirkelgen. Onyń 56-sy ǵana Prokýratýra organdaryna jiberildi. Bul týraly Sybaılas jemqorlyqqa qarsy is-qımyl agenttigi Tóraǵasy Oljas Bektenov aıtty, dep habarlaıdy QazAqparat tilshisi.

«Azamattardyń, kúshtik qurylymdar qyzmetkerleriniń is-áreketterine bergen aryzdary boıynsha qylmystyq isterdi tergeý protsesi odan da kúrdeli boldy. Sybaılas jemqorlyqqa qarsy qyzmet osyndaı 432 qylmystyq isti tergedi. Olardy tergeýge eń tájirıbeli teregýshiler tartyldy. Negizgi qıyndyq – oqıǵalardyń retsizdigi men jappaı bolýymen baılanysty. Aryzdanýshylar betperde men kaska kıgen polıtseılerdi kórsetti, ıaǵnı olar júzderin de kórmegen, esimderin de bilmeıdi. Kóptegen beınekameralardyń jumys istemeýi de tergeýdi qıyndatty», - dedi O. Bektenov Májilistiń búgingi otyrysynda.

Spıkerdiń aıtýynsha, tergeý jumysyn durys uıymdastyrý 347 qylmystyq is boıynsha oqıǵalardyń hronologııasyn qalpyna keltirýge múmkindik berdi.

Azaptaýdy tergeý jónindegi Ystanbul hattamasynyń talaptaryn oryndaý maqsatynda 851 sot saraptamasy júrgizildi. Sot-medıtsınalyq sarptama 344 adamǵa júrgizildi, nátıjesinde 239-ynda dene jaraqaty anyqtaldy. 105 adamda dene jaraqaty tabylmady. Taǵy 59 aryzdanýshy óz quqyǵyn paıdalanyp, saraptama júrgizýden bas tartqan.

«Obektıvti derekter negizinde dene jaraqattary kóshedegi tártipsizdikter kezinde alyndy degen qorytyndy jasaldy. Muny rastaý úshin mynadaı statıstıka keltireıin: aryzdanýshylardyń kóp bóligi, ıaǵnı 403 aryzdanýshynyń 271-i tártipsizdikterdi uıymdastyrý jáne olarǵa qatysý, bılik ókilderine zorlyq-zombylyq kórsetý, qarý urlaý, tonaý jáne basqa da qylmystar boıynsha kúdikti bolyp tabylady. Bul qylmystyq isterdi arnaıy prokýrorlar men polıtsııa organdary tergep jatyr. Qolda bar derekter boıynsha 182 aryzdanýshy sottaldy, 18 adamǵa qatysty ister sotta qaralýda», - dedi agenttik tóraǵasy.

Quqyq qorǵaý organdary qyzmetkerleriniń is-áreketine aryzdardyń kópshiligi 1 aı nemese odan da kóp ýaqyttan keıin túse bastady, bul dáleldeý protsesin edáýir qıyndatty.

«Mysaly, Qostanaıda Anýhanov jappaı tártipsizdikterge qatysý týraly qylmystyq is boıynsha kúdikti bola tura, azaptaý týraly ótinishti 45 kúnnen keıin bergen. Sotqa deıingi tergep-tekserý nátıjeleri boıynsha polıtsııa qyzmetkerleriniń azaptaýǵa qatysy týraly dálelder rastalmady. Qostanaı qalasynyń soty Anýhanovty Qylmystyq kodekstiń 272-baby boıynsha kináli dep tanyp, 4 jylǵa bas bostandyǵynan aıyrdy. Mundaı mysaldar azaptaý týraly aryzdardyń kóp jaǵdaıda ózderiniń zańsyz áreketteri úshin qylmystyq jaýapkershilikten qutylý maqsatynda jasalǵanyn kórsetedi», - dedi O. Bektenov.

Tergeý nátıjeleri boıynsha 347 is qylmys quramynyń bolmaýyna baılanysty toqtatyldy, sebebi qyzmetkerlerdiń zańsyz áreketteri týraly jetkilikti obektıvti derekter anyqtalǵan joq. Qadaǵalaýshy prokýrorlar protsestik sheshimderdi bekitti, Qylmystyq-protsestik kodekske engizilgen ózgeristerdi eskere otyryp, Prokýratýra organdaryna barlyǵy 56 qylmystyq is jiberildi.