Qańtardaǵy UBT: Eki aptada 79 myńnan astam talapker test tapsyrdy

ASTANA. KAZINFORM - Qańtar aıyndaǵy UBT-nyń eki aptasynda 79 myńnan astam adam test tapsyrdy. Shekti baldy 70%-ǵa jýyq talapker jınady. Bul týraly Ǵylym jáne joǵary bilim mınıstrligi málimdedi.

Testileý nátıjesi boıynsha ortasha ball 65 baldy qurady. Eń joǵary ball – 137, ony eki oqýshy jınady.

Testke qatysýshylardyń 76,8%-y qazaq tilinde, 23,1%-y orys tilinde, 46 adam aǵylshyn tilinde testileýden ótti.

Talapkerlerdiń basym bóligi, 16,9%-dan «Matematıka-Fızıka» jáne «Bıologııa-Hımııa» pánder kombınatsııasyn tapsyrdy. 10,3%-y «Shyǵarmashylyq emtıhan» kombınatsııasyn tańdaǵan. Eń az tańdalǵan kombınatsııa – «Hımııa-Fızıka», ony 105 adam tapsyrǵan.

Erekshe bilim berý qajettilikteri bar oqýǵa túsýshiler úshin qolaıly jaǵdaı jasaýdyń arqasynda qańtar UBT-syna 203 talapker qatysty.

Talapkerler testileý aıaqtalǵannan keıin 30 mınýt ishinde apellıatsııaǵa bere alady, bul jaǵdaıda sertıfıkat apellıatsııa týraly sheshim qabyldanǵannan keıin testilenýshiniń jeke kabınetinde qoljetimdi bolady.

Qazirgi tańda 111 adamnyń nátıjesi joıyldy. Onyń ishinde 70 talapker smartfon jáne shpargalka sııaqty tyıym salynǵan zattardy alyp ótý áreketi saldarynan test tapsyrý múmkindiginen aıyryldy, al testileý kezinde erejelerdi buzǵany úshin aýdıtorııadan 41 adam shyǵaryldy. Ózge tulǵalar anyqtalǵan joq.

Aıta ketsek, 2025 jylǵy UBT aıaqtalǵannan keıin kúntizbelik jyldyń 31 qazanyna deıin testileýdiń beınejazbalaryna taldaý júrgiziledi. Tyıym salynǵan zattardy paıdalaný nemese erejelerdi buzý faktileri anyqtalǵan jaǵdaıda túsýshiniń UBT nátıjeleri joıylady.

Esterińizge sala ketsek, qańtar UBT-sy 13 qańtar men 10 aqpan aralyǵynda ótedi. Testileýge qatysýǵa 167 myńǵa jýyq talapker nıet bildirgen.